Kom vier fees saam met Senior Park

Die Senior Park-aftreeoord bied eerskomende Saterdag ’n basaar aan onder die tema “Go Turquoise for the Elderly”.

Dié veldtog is ’n maandlange inisiatief wat elke jaar lede van die publiek aanmoedig om turkoois te dra om bewusmaking te verhoog van kwessies wat senior burgers raak. Die Vereniging vir Senior Burgers verkoop ook gehekelde turkoois blommetjies om geld vir bejaardes in te samel.

Saam met jukskei, wat by Senior Park se nuwe bane gespeel gaan word, sal ’n paar basaartreffers soos worsbroodjies, jaffels en spookasem ook beskikbaar wees.

“Nostalgie is goed, maar ons moet eerder vorentoe kyk en beplan. Ons kan nie die verlede verander nie, maar ons kan beslis ons toekoms beïnvloed en ons kennis terugploeg,” lui ’n verklaring van die Vereniging vir Senior Burgers.

Afgesien van die veldtog se doel om bejaardes te bemagtig, skep dit ook bewusmaking oor die verwaarlosing en mishandeling van ou mense deur lig te werp op die verskeie faktore wat daartoe lei.

– [email protected]