Kleindogter sit seepdroom voort

In die hart van Rehoboth Blok E se gemeenskap leef die nalatenskap van ’n merkwaardige vrou in ’n nederige agterplaas voort. Welfrieda Beukes, ’n entrepreneur en toegewyde ma, het Budget Soap Manufacturers cc in 1996 uit haar huis begin, gedryf deur die behoefte om vir haar agt kinders – vier van haar eie en vier van haar oorlede suster – te sorg. Beukes, geliefd en bekend as Mietjies of Frieda, is op 16 Augustus 2021 oorlede, maar jare later leef haar nalatenskap voort met haar kleindogter Grace Scott wat haar ouma se seepdroom voortsit. “My ouma het die rol van beide ouma en oupa vervul,” vertel Grace.“Sy was ’n vrou met ongekende krag, wysheid en waagmoed en is my daaglikse inspirasie.”Van ’n nederige begin by haar huis, het ouma Mietjies se produkte tot ’n erkende handelsnaam op Rehoboth gegroei en word dit vandag aan gewilde plaaslike besighede, soos Volkswinkel Spar en Dolphin Fish & Chips, verskaf. Grace wat nou aan die stuur van die maatskappy se bemarkings- en administratiewe afdeling staan, sê sy ervaar ’n gevoel van trots maar ook ’n plig. “Vir ’n lewenskragtige en gretige jong meisie was dit net die regte ding om te doen,” sê Grace.“Ons wil voortbou op wat Ouma begin het om nie net ’n besigheid te laat groei nie, maar ook om ’n werklike impak te maak.”Hoewel die produksie steeds op ’n klein skaal is, is die hoop vir die toekoms groot. Die huidige ligging in ’n agterplaas beperk produksie, maar die maatskappy is op soek na geskikte grond om groter en beter toegeruste geriewe te bou. “Ons bid vir gunstige omstandighede in ons dorpsraad, sodat Budget Soap Manufacturers grondeienaars kan word,” vertel Grace. “Met die ondersteuning van beide plaaslike en internasionale beleggers kan ons meer permanente werksgeleenthede skep en families op Rehoboth en Namibië ophef.”Budget Soap gebruik tans seisoenale jeugwerkers uit die gemeenskappe wat roteer om te verseker meer huishoudings word bereik. Die pad tot hier was egter nie sonder struikelblokke nie, sê Grace. Die span sny steeds blokkies vet met die hand, die geriewe het ’n gebrek aan noodsaaklike nywerheidstoerusting en sonder ’n betroubare voertuig ervaar hulle logistieke uitdagings. “Die grootste bestanddeel in ons seep is vet, maar ons het nie ’n vaste verskaffer nie. Ons het ook dringend ’n bakkie nodig om ons seep landswyd af te lewer.”Maar, ten spyte van die uitdagings, word die span van Budget Soap steeds deur ouma Mietjies se voorbeeld en woorde gemotiveer.“My ouma het altyd gesê ‘wanneer jy soggens opstaan om hierdie werk te doen, doen dit asof jy vir iemand anders en nie vir jouself werk nie’. Want die oomblik wat jy vir jouself sê ‘maar ek is die baas’, is jy geneig om te ontspan en nie ekstra moeite te doen nie.”Grace se visie vir die toekoms is duidelik – om die besigheid te laat groei, volhoubare werksgeleenthede te skep en haar ouma se droom met trots voort te sit.Budget Soap-produkte word tans vervaardig gebaseer op kliënte se voorkeure. Onderhandelinge met potensiële vennote is ook aan die gang. “Ons ondersoek moontlikhede om uit te brei, beleggers te lok en dit uiteindelik ’n nasionaal erkende handelsnaam te maak,” sê Grace. – republikein@republikein.com.na

Kleindogter sit seepdroom voort

Kommentaar

Republikein 2025-10-22

Meld asseblief aan om kommentaar te lewer

Kleindogter sit seepdroom voort

Kommentaar

Republikein 2025-10-22

Meld asseblief aan om kommentaar te lewer

MELD AAN

Advertensie