Khorixas-jonges ploeg terug in gemeenskap

Met alles van harke en besems tot skêre en kamme, gaan ’n groep jongmense op Khorixas twee spesiale projekte in diens van hul gemeenskap aanpak in die gees van Mandeladag, wat Vrydag gevier word. Die enigste speelgrond op die dorp gaan skoongemaak word, terwyl die groep jong inwoners ook gevangenes by die polisiekantoor op die dorp met ’n gratis haarsny gaan bederf. “Ons probeer nie om die wêreld in een dag te verander nie,” sê Clemans Miyanicwe, stigter van die Khorixas Young Up-beweging. “Maar ons doen ons klein deeltjie. As ons vir iemand anders gaan wag, mag ons dalk vir altyd wag.”Volgens Clemans is die dorp se enigste speelgrond in ’n haglike toestand, oorgroei met gras en onkruid en met ’n vullishoop teen die heining wat dit alles behalwe ’n veilige en skoon speelplek vir kinders maak. Rural Dialogue Namibia onder Clemans se leierskap het in 2022 ook die speelgrond op Mandeladag skoongemaak. “Duidelik het die onkruid nie die boodskap gekry dat [Nelson] Mandela vir ’n skoner, beter gemeenskap gestaan het nie,” het hy gesê.Vanjaar se pogings strek egter verder as die speelgrond, met Ellis Geiriseb wat aan 50 verhoorafwagtendes die kans op ’n gratis haarsny gee. “Net omdat iemand agter tralies is, beteken dit nie ons moet hul menslikheid vergeet nie,” het hy gesê.“Laat ons nie vergeet hierdie mense wag op ’n verhoor nie en, soos die Grondwet ons herinner, is hulle onskuldig totdat hulle skuldig bevind word. Hulle verdien ook waardigheid.”Dié inisiatief gaan oor meer as net morele ondersteuning, het Clemans verduidelik. Tot dusver het die Khorixas-kiesadeling vullissakke geskenk, terwyl Khorixas se gemeenskapsradio gehelp het om bewustheid vir die inisiatief te skep. Meer is egter nodig, veral in die vorm van water, sap, kos vir die vrywilligers en toiletware soos seep, tandepaste, waspoeier en ander basiese higiëniese produktevir die verhoorafwagtendes. “Ons wil dit ’n gereelde instelling maak, elke derde maand of wanneer die behoefte ontstaan. Maar vir dit het ons meer as morele ondersteuning nodig. “Ons het werklike gemeenskapsondersteuning nodig, dit is tyd om terug te gee. Mandela het die fondasie gelê. Ons maak net die krake toe en snoei ’n paar takke.” – republikein@republikein.com.na

Khorixas-jonges ploeg terug in gemeenskap

Kommentaar

Republikein 2025-11-03

Meld asseblief aan om kommentaar te lewer

Khorixas-jonges ploeg terug in gemeenskap

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.