/Khomanin maak geskiedenis

Die /Khomanin Tradisionele Gemeenskap het die naweek hul voorvaderlike grond by !Ao-//Aaexas Farm no. 34 teruggeëis, 69 jaar ná hul beweerde gedwonge verwydering. “Die grond is ons s'n en ons gaan daarop bly,” het die maatskaplike aktivis Shaun Gariseb tydens die geleentheid gesê, wat die gemeenskap se vasberadenheid beklemtoon om terug te eis wat van hulle weggeneem is.Die /Khomanin is na bewering tussen 1947 en 1957 onder die heerskappy van apartheid onder dwang verplaas, met die grond wat aan Suid-Afrikaanse setlaars gegee is. Ondanks dekades se klagskrifte en onderhandelinge het die groep se beroep op geregtigheid op dowe ore geval. Hul poging in 1992 om na die grond terug te keer het tot arrestasies gelei. Alles het egter na soveel dekades op 29 Maart verander. Volgens Gariseb is die terugkeer na !Ao-//Aaexas Farm no. 34 nie net simbolies nie, maar ook om hul identiteit en erfenis terug te eis. Die grond, wat die tuiste is van meer as 60 voorvaderlike grafte, lê die afgelope 25 jaar braak. Hy sê die gemeenskap kon nie langer toekyk hoe hul heilige terreine verwaarloos word, soos wat in die nabygeleë Baumgartsbrunn gebeur het nie.“Ons het vir jare lank by die regering gepleit, maar ons pleidooie het dadels van gekom,” sê hy. “Hierdie grond hou die grafte van ons voorvaders. Dit is nie private eiendom nie, dit is gesteel en toe geprivatiseer.”Gariseb sê vir dekades lank word die /Khomanin grondbesit in die Khomasstreek geweier, terwyl buitelandse burgers verskeie plase besit. Hy het bygevoeg dat die herbesetting aanvanklik met weerstand begroet is, met die polisie wat bereid was om die meer as 40 gemeenskapslede in hegtenis te neem. Ná samesprekings is daar egter ’n geskiedkundige ooreenkoms met die Roos-familie, die huidige grondeienaars, bereik.“Dis ’n wonderlike dag. Ons sterre val in lyn vir die /Khomanin-mense,” het Gariseb gesê. “Selfs die polisie wat gekom het om ons in hegtenis te neem, het die waarheid van ons saak gesien.”Planne is nou aan die gang om ’n vergadering met Mac Albert Hengari, die minister van landbou, visserye, water en grondhervorming, te reël om die ooreenkoms te formaliseer.Die /Khomanin versoek nou mediasie met die regering, die terugkeer van die oorskot van hul wyle hoofman Alfeus !Garigorob Haraseb om op hul voorvaderlike grond begrawe te word, sowel as die implementering van die resolusies van Namibië se tweede grondkonferensie. “Ons het vandag geskiedenis gemaak,” het Gariseb afgesluit. “Ons het gedoen wat ons mense al meer as 35 jaar gesukkel het om te bereik.” – republikein@republikein.com.na

/Khomanin maak geskiedenis

Kommentaar

Republikein 2025-12-19

Meld asseblief aan om kommentaar te lewer

/Khomanin maak geskiedenis

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.