Hoofstad se brandpunte vir misdaad

Aurelia Afrikaner en Chris Kaukemua – Okahandja Park, Havana en Okuryangava is geïdentifiseer as die gebiede in Windhoek waar die meeste misdaad voorkom.Volgens statistieke van die stadspolisie is 15 112 misdrywe oor vyf jaar hier aangeteken. Dit sluit 9 016 eiendomverwante oortredings en 6 096 geweldsmisdade in. Volgens die woordvoerder van die stadspolisie, superintendent Marcelline Murapo, is die betrokke gebiede geïdentifiseer as dié met die hoogste konsentrasie aangemelde sake. Die sake verskil, volgens Murapo, na gelang van die kategorie waaronder die misdaad val. Van die 15 112 sake is 5 194 voorvalle van diefstal in Okahandja Park, Havana en Okuryangava aangemeld, gevolg deur 3 281 van huisbraak, 297 van diefstal uit motorvoertuie en 244 van inbrake by besighede. Die sake sluit 3 006 voorvalle van aanranding met die opset om ernstig te beseer in, asook 2 736 rooftogte, 147 gewapende rooftogte, 130 pogings tot moord en 77 moorde.Die statistieke identifiseer verder die Wernhil- en Independence Shoprite-inkoopsentrums, asook die sentrale sakekern, as brandpunte vir misdaad in die hoofstad. Hier is altesaam 5 797 sake aangeteken. Damara Location, Katutura Shoprite en die B1 City-inkoopsentrum word ook as brandpunte in die statistieke uitgesonder, met 4 212 misdade wat daar plaasgevind het. Gerhard Tjambiru, wat naby die Katutura Shoprite woon, het gesê straatligte in die gebied is onvoldoende om inwoners se veiligheid te verseker.“Selfs om in jou eie erf te sit, is nie veilig nie. Jy kan elke aand mense hoor skree, terwyl jy in jou huis is. Die gebied is onveilig, in so ’n mate dat jy vroeër of later self deel van die statistieke kan word,” het Tjambiru gesê. Met verwysing na geweldsmisdade, is 2 511 voorvalle in Goreangab en Greenwell Matongo aangeteken, gevolg deur Damara Location, Katutura Shoprite, B1 City-inkoopsentrum, Nama Location en Dolam met 2 510 voorvalle. Caroline Kotze, ’n gemeenskapslid wat die afgelope 20 jaar in die Nama Location woon, het gesê daar is altyd lawaai en beweging in die nedersetting. “Ons kry nooit rus nie, of dit nou die begin of die einde van die maand is. “Daar is elke dag van die week misdaad – van die gryp van selfone tot die aanranding van mense totdat hulle bewusteloos is, of selfs steekvoorvalle,” het Kotze gesê. Volgens haar het sy twee weke gelede ook haar niggie weens ernstige aanranding verloor. “My niggie is so erg aangerand dat sy breinskade opgedoen het – tot so ’n mate die familie is aangeraai om die lewensondersteunende masjien af te skakel. “Dit is baie hartseer en dit wys net hoe ernstig die situasie hier in die Nama Location geword het,” het sy gesê.Murapo het beklemtoon die betrokke gebiede wat as brandpunte vir misdaad uitgesonder is, beteken nie dat kriminele aktiwiteite in die hoofstad net tot hierdie gebiede beperk is nie. “Misdaadpatrone is nie staties nie. Gebiede met hoër vlakke van gerapporteerde misdaad kan verander, afhangende van voorvalle wat aangemeld word, die bewegings van oortreders en ander tendense wat na vore kom,” het sy gesê. Volgens haar pas die stadspolisie verskeie maatreëls toe om misdaad te bekamp. Dit sluit meer gereelde patrollies, intelligensiegedrewe polisiëring, toesig deur middel van geslotekringtelevisie (CCTV) en die gebruik van hommeltuie in.Murapo het gesê beamptes gaan in aangewese sones ontplooi word, met patrollies en hulpbronne wat gerig word op gebiede waar hoë misdaadsyfers geïdentifiseer is.Intelligensiegedrewe polisiëring stel beamptes ook in staat om misdaadpatrone te ontleed, herhaalde oortreders te identifiseer en ingrypings te fokus op plekke waar dit die nodigste is, het sy gesê. Volgens Murapo help CCTV-kameras wat in misdaadsensitiewe gebiede geïnstalleer is, beamptes om verdagte aktiwiteite dop te hou en op voorvalle te reageer.Die stadspolisie werk ook nou saam met ander munisipale departemente om beligting in strate te verbeter deur hoëmasligte te installeer, gebiede te ontbos en ook heinings op te rig in gebiede waar misdadigers maklik toegang tot eiendomme of potensiële slagoffers kan kry.“Ons werk saam met buurtwagte, werksgroepe in gemeenskappe, inwoners en ander belanghebbendes om plaaslike kwessies te identifiseer en gesamentlik gepaste ingrypings te ontwikkel,” het sy gesê. Murapo sê gemeenskapspolisiëring bly ’n belangrike deel van misdaadvoorkoming, waar buurtwagte, inwoners en ander belanghebbendes beamptes bystaan om kriminele aktiwiteite te identifiseer.Geheime operasies en doelgerigte misdaadvoorkomingsaksies word ook uitgevoer in gebiede waar intelligensie-inligting op ’n behoefte aan ingryping dui.Stephanus Johannes, wat reeds ses jaar lank in Havana woon, het vertel hy is in Augustus helder oordag in Ombili van sowat N$3 000 beroof.Johannes was omstreeks 15:00 op pad huis toe, nadat hy by die taxistaanplek by die Woermann Brock-supermark uit ’n taxi geklim het. Hy is deur drie mans gekonfronteer, met twee wat hom van voor genader het, terwyl die derde hom van agter aan sy arms gegryp het. Hy is van sy kontant beroof. – aurelia@nmh-hub.com.na

Hoofstad se brandpunte vir misdaad

Kommentaar

Republikein 2026-11-03

Meld asseblief aan om kommentaar te lewer

Hoofstad se brandpunte vir misdaad

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.