Harry verlore sonder sy klavier

Nadat hy genoeg geld vir ’n draagbare elektroniese klavier gespaar en dit gekoop het, het deure vir die blinde klavierspeler Harry Rheeder oopgegaan. “Ek het vir die Europese Unie gespeel en hulle het my gevra om hulle 74ste verjaardagliedjie ‘Better Tomorrow’ te speel en ek was deel van die video. Ek het genoeg geld gemaak om die broodnodige klavier te koop. In my tipe werk is alles afhanklik van goeie klank. “Ek het die elektroniese klavier in 2020 op Tsumeb gekoop omdat die klank uitstekend was en die prys my sak gepas het. Ek het egter nie geweet dat Casio die verkeerde handelsmerk is om te koop nie.”Rheeder se elektroniese klavier is nou stukkend omdat niemand in Namibië dit kan diens nie en nou ook nie kan herstel nie. “Die handelsmerk is glo die probleem en ek is aangeraai om ’n ander handelsmerk soos Yamaha te koop. Ek probeer die geld spaar, maar met dié dat die klavier stukkend is, kan ek nie alle gigs speel nie. “Ek speel elke Dinsdag, Woensdag en Donderdag vanaf 17:00 tot 19:00 by die Hilton Hotel. Vrydagaande speel ek by Utopia in Klein Windhoek, Saterdagaande speel ek en twee mans daar en Sondagaande ek en ’n hele groep. Ek moet egter ook gigs doen.”Rheeder vertel hoe hy vir die First Lady Foundation op ’n goedkoop klavier gespeel het en hoe swak die klank was. “Ek was baie verleë daaroor. Ek sal dit waardeer as mense my dalk kan help sodat ek weer gigs op my eie kan doen.”Hy vertel van die beste oomblik in sy lewe toe hy nog in die Gustav Voigts-sentrum gespeel het. “Ek bly ver van die bushalte af en ek het dié dag my vyfjarige dogter, Divine, saamgevat. Ek het haar aan die een hand gehad en die klavier in die ander een. Dit was moeilik en ons moes vir mense vra om ons tot by die taxi te help. Toe ek uiteindelik opgestel en begin speel het, het sy voor my gestaan en gesien hoe die mense geld gee. Sy het haar blokfluit uitgehaal en begin speel en dans. Dit was ongelooflik.”Rheeder is op Usakos met retinitis pigmentosa – die oorerflike, toenemende degenerasie van die retina wat uiteindelik blindheid veroorsaak – gebore.Toe hy nege maande oud was het sy ma hom dokter toe gevat en hy is met siggestremdheid gediagnoseer. “In daardie jare was daar net een skool vir blinde kinders in die Noorde en een in Suid-Afrika. Beide skole was te ver van Usakos af en my ouers kon nie bekostig om my weg te stuur nie.”Windhoek se skool vir siggestremdes het geopen en Rheeder was een van die eerste leerlinge om op negejarige ouderdom daar ingeskryf te word. Volgens Rheeder het hy nog altyd in musiek belanggestel en het hy een vakansie by die huis op ’n klawerbord begin speel. Ná die vakansie het hy vir die skool gesê hy wil graag leer hoe om die instrument te bespeel. ’n Onderwyser het die 10-jarige Rheeder toe geleer om klavier te speel.Hy het nooit geleer om note te lees nie.“Ek luister na liedjies op die radio en dan speel ek dit. Ek oefen tot dit soos die liedjie op die radio klink.” – tanja@republikein.com.na

Harry verlore sonder sy klavier

Kommentaar

Republikein 2026-05-06

Meld asseblief aan om kommentaar te lewer

Harry verlore sonder sy klavier

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.