Grootfontein keelvol vir leë krane

Grootfonteiners was Maandag moedeloos toe groot dele van die dorp vir die vierde agtereenvolgende dag wateronderbrekings ondervind het. Intussen het dié Noordedorp se munisipaliteit gisteroggend (10 Mei) aan Republikein bevestig hul tegniese span is besig om waterpompe by hul boorgate by die tweede reservoir te herstel. Dié reservoir is in die dorp se Buitekamp-gebied geleë. Die dorp se woordvoerder, mnr. Luke Salamo, het bevestig die watertoevoer na die hele noordelike deel van die dorp word geraak; tot so ver as die Total-diensstasie, wat langs die pad in die rigting van Rundu geleë is. Nog gebiede wat geraak word, sluit in Luiperdheuwel, Uitbreiding 2, Mini-town, die waterwese-gebied asook Woodland.“Ons vra inwoners om water spaarsamig te gebruik omdat die reservoirs se watervlakke kritiek laag is. Oor die volgende twee dae mag waterverskaffing baie beperk wees,” het hy bygevoeg. “Ons verwag dat die herstelwerk teen Woensdag afgehandel sal wees. Ons sal inwoners op hoogte hou.” Intussen het inwoners, wat graag anoniem wou bly, aan Republikein gesê wateronderbrekings is ‘n gereelde probleem op die dorp, terwyl die dorp ook elke nou en dan kragonderbrekings ervaar. Sommige inwoners meen hulle het ’n verbetering in die dorp se dienslewering bespeur vandat die nuwe dorpsraad vroeër vanjaar beëdig is, aangesien verskeie slaggate herstel is en gebiede wat rioolprobleme ervaar, ontvang spoedige reaksie op klagtes. Straatverkopers, wat verlede maand betoog het nadat hulle ‘n hofbevel ontvang het om hul stalletjies te ontruim, het ook aangedui hulle was baie tevrede daarmee toe die nuwe burgemeester persoonlik na hulle kom luister en hulle toegespreek het.POLITIEKIntussen het ondersteuners van die nuut verkose burgemeester, me. Thalita Garises, aangekondig ‘n vreedsame optog sal op Vrydag (13 Mei) in solidariteit met haar gehou word. “Dit volg ná daar verskeie oproepe in die sosiale media gedoen is om Garises uit haar amp te skors. “Garises se ondersteuners sal vanaf 11:00 van die dorp se Omulunga-gemeenskapsaal loop om ‘n klagskrif aan beide die munisipaliteit asook Swapo se streekkantoor te oorhandig,” is in ‘n omsendbrief deur die organiseerders van die geleentheid, me. Susanna Schwarz en mnr. Josef Andreas, geskryf.Grootfontein het ‘n lang geskiedenis van verdeeldheid onder Swapo-kamerade, terwyl dit ook voortdurend in die nuus oor politieke twis is. ‘n Verdoemende verslag verlede jaar deur die ministerie van landelike en stedelike ontwikkeling oor die dorp se munisipale sake, waarin grootskaalse korrupsie beweer word, asook twee swak (gekwalifiseerde) ouditmenings van Namibië se ouditeur-generaal, het ook gesorg dat die dorp gereeld in die nuus is.&#039;n Ministeriële forensiese ondersoek het onthul dat politici en personeellede van die munisipaliteit op Grootfontein en hul makkers grond vir hulself toe-eien en winsgewende tenders losslaan, terwyl die munisipaliteit uitmekaar val.Die verslag, wat ons susterkoerant Namibian Sun onder oë gehad het, beskryf ook hoe swak verhoudings tussen raadslede, bestuurders en personeellede lei tot swak dienslewering en produktiwiteit en hoe erwe van eienaars afgeneem en aan munisipale werkers gegee is.Die ministerie van stedelike en landelike ontwikkeling het in 2019 van 11 tot 29 Maart ondersoek na beweerde wanbestuur en ongerymdhede by die munisipaliteit ingestel.Tans is die munisipaliteit se uitvoerende hoof, mnr. Kisco Sinvula, met volle betaling geskors sodat die dorpsraad ‘n ondersoek teen hom oor beweerde wanpraktyke kan afhandel. ’n Geskil heers egter oor of dié skorsing wettig is, met minister Erastus Uutoni wat glo gekant is teen die dorpsraad se besluit. – elvira@republikein.com.na

Grootfontein keelvol vir leë krane

Kommentaar

Republikein 2025-11-04

Meld asseblief aan om kommentaar te lewer

Grootfontein keelvol vir leë krane

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.