Europa wink vir Namib Chilli
Planne om besigheid uit te brei
Drie jaar ná Johann en Luzaan Viljoen begin het om brandsouse te verkoop om die pot aan die kook te hou, sal Namib Chilli eersdaags sy eerste besending na Europa uitvoer.
Ná Johann Viljoen en sy vrou, Luzaan, noodgedwonge gedurende die Covid-19-pandemie brandsouse moes begin verkoop, sal hierdie eg Namibiese produk eersdaags Europese kosrakke tref.
Die Viljoen-egpaar het jare in die gasvryheidsbedryf gewerk en hul toekomsplanne is in die wiele gery toe inperkings die toerisme- en gasvryheidbedryf op sy knieë gebring het.
Meer as twee jaar nadat Namib Chilli op die been gebring is, het Johann ’n vervaardiger van rissiesouse in Suid-Afrika gekontak en besef hulle sal die souse moet uitvoer vir die besigheid om suksesvol te wees.
“Daar is 2,5 miljoen mense in Namibië waarvan 2 500 rissiesouse eet en 2 000 hulle eie souse maak. Ons kan nie oorleef op die plaaslike mark nie en ons kan nie in Suid-Afrika verkoop nie, want daar is reeds ’n groot verspreider. Dus het ek besef ek gaan moet uitvoer,” het hy gesê.
“Ek is ’n Dopper – ons doen alles volgens die boek. Ek het toe vir die Here gevra hy moet vir my ’n teken gee as ons moet begin uitvoer – dit was die Vrydag. Vier dae later is ons genooi om by die Swaitex Internasionale Handelskou uit te stal met ’n geborgde stalletjie en alles,” sê hy.
Hiér het Johann verteenwoordigers van die Namibiese Kamer van Koophandel (NCCI) ontmoet en is die moontlikheid van uitvoere bespreek.
“Net daar was die teken,” sê hy van daardie oomblik.
Johann sê dit is egter nie so eenvoudig om produkte te begin uitvoer soos dit mag voorkom nie.
“Ek het na verspreiders op die internet begin soek en vir hulle ’n e-pos gestuur oor ons souse en talle het gesê hulle sal graag die souse wil proe. Ons het vir hulle gestuur, maar talle het dit nog nie probeer nie. Die verspreiders word oorval met verskillende mense se souse en hulle kom net nie deur almal s’n nie,” sê hy.
Johan sê buitelandse markte kan oornagsukses vir Namib Chilli beteken.
“In Amerika het hulle verlede jaar 1,6 miljoen liter rissiesous verbruik – as ek net 1% van dié mark kan kry is my kop deur. . . In Engeland verkoop hulle meer rissiesous as tamatiesous,” sê hy.
Johann is tans hard aan die werk om duisende bottels brandsous voor te berei om na Duitsland uit te voer in samewerking met die Duitse verspreider Chilli Food.
“Ons is nog net besig met die logistieke beplanning om dit uit te voer,” sê hy.
Johann sê ook dat moontlikhede in die Verenigde Koninkryk wink.
Planne om Namib Chilli se souse – sewe op ’n slag – na die buiteland uit te voer is ook tans in die pyplyn.
“Sewe botteltjies weeg net-net genoeg dat jy nie te veel aan uitvoerkoste hoef te bestee nie. So ons werk daaraan dat mense sewe botteltjies kan koop, dan laat lewer ons dit by hulle huise in die buiteland af,” sê hy.
– [email protected]
Die Viljoen-egpaar het jare in die gasvryheidsbedryf gewerk en hul toekomsplanne is in die wiele gery toe inperkings die toerisme- en gasvryheidbedryf op sy knieë gebring het.
Meer as twee jaar nadat Namib Chilli op die been gebring is, het Johann ’n vervaardiger van rissiesouse in Suid-Afrika gekontak en besef hulle sal die souse moet uitvoer vir die besigheid om suksesvol te wees.
“Daar is 2,5 miljoen mense in Namibië waarvan 2 500 rissiesouse eet en 2 000 hulle eie souse maak. Ons kan nie oorleef op die plaaslike mark nie en ons kan nie in Suid-Afrika verkoop nie, want daar is reeds ’n groot verspreider. Dus het ek besef ek gaan moet uitvoer,” het hy gesê.
“Ek is ’n Dopper – ons doen alles volgens die boek. Ek het toe vir die Here gevra hy moet vir my ’n teken gee as ons moet begin uitvoer – dit was die Vrydag. Vier dae later is ons genooi om by die Swaitex Internasionale Handelskou uit te stal met ’n geborgde stalletjie en alles,” sê hy.
Hiér het Johann verteenwoordigers van die Namibiese Kamer van Koophandel (NCCI) ontmoet en is die moontlikheid van uitvoere bespreek.
“Net daar was die teken,” sê hy van daardie oomblik.
Johann sê dit is egter nie so eenvoudig om produkte te begin uitvoer soos dit mag voorkom nie.
“Ek het na verspreiders op die internet begin soek en vir hulle ’n e-pos gestuur oor ons souse en talle het gesê hulle sal graag die souse wil proe. Ons het vir hulle gestuur, maar talle het dit nog nie probeer nie. Die verspreiders word oorval met verskillende mense se souse en hulle kom net nie deur almal s’n nie,” sê hy.
Johan sê buitelandse markte kan oornagsukses vir Namib Chilli beteken.
“In Amerika het hulle verlede jaar 1,6 miljoen liter rissiesous verbruik – as ek net 1% van dié mark kan kry is my kop deur. . . In Engeland verkoop hulle meer rissiesous as tamatiesous,” sê hy.
Johann is tans hard aan die werk om duisende bottels brandsous voor te berei om na Duitsland uit te voer in samewerking met die Duitse verspreider Chilli Food.
“Ons is nog net besig met die logistieke beplanning om dit uit te voer,” sê hy.
Johann sê ook dat moontlikhede in die Verenigde Koninkryk wink.
Planne om Namib Chilli se souse – sewe op ’n slag – na die buiteland uit te voer is ook tans in die pyplyn.
“Sewe botteltjies weeg net-net genoeg dat jy nie te veel aan uitvoerkoste hoef te bestee nie. So ons werk daaraan dat mense sewe botteltjies kan koop, dan laat lewer ons dit by hulle huise in die buiteland af,” sê hy.
– [email protected]
Kommentaar
Republikein
Geen kommentaar is op hierdie artikel gelaat nie