Een sokkerbal op ’n slag

Emilie Abraham het haar passie vir sport in ’n baken van hoop vir jong seuns in die Okatseidhi-nedersetting in die Omusatistreek omskep.In ’n onderhoud met Republikein het Emilie, bestuurder by die Namibiese Agronomiese Raad (NAB) en voorsitter van die Sheanest-sportontwikkelingsprojek, gesê dat baie seuns in haar nedersetting hulle tot alkohol wend en hul natuurlike talente verkwis.“Dit het alles begin toe die seuns ons genader en gevra het of ons vir hulle ’n sokkerbal kon borg,” het sy gesê.“Ons gesin is passievol oor sport; my man en ek het albei sokker gespeel. Ons het besluit om vir hulle ’n sportveld te skep en het twee sokkerballe gekoop. Hul vreugde was onbeskryflik,” vertel Emilie. Wat met net twee balle begin het, het in ’n omvangryke gemeenskapsinisiatief ontwikkel. Die projek wat in 2025 as ’n gesinsinisiatief van stapel gestuur is, het ten doel om talent in landelike gebiede te ontwikkel. Dit poog ook om alkoholgebruik – wat dikwels daartoe lei dat leerlinge skool verlaat – te ontmoedig en misdaad te voorkom.“Ons wil geleenthede vir hierdie seuns skep om hul talente ten toon te stel, met die breër sportgemeenskap te skakel en uiteindelik by groot spanne aan te sluit en ’n naam vir hulself te maak sodat ons hulle, indien moontlik, op televisie kan sien,” sê Emilie. Sy glo ook daar skuil onontginde talent in talle plaaslike nedersettings en dorpe en dat almal ’n rol kan speel om ’n beter toekoms vir jongmense te skep.“Dit neem net een persoon wat vir ’n gemeenskap opstaan om die lewens te verander van diegene wat voel dat hulle geen stem het nie,” het Emilie gesê.“’n Gesamentlike poging is egter noodsaaklik. Ons sukkel om water, kos en sportuitrustings aan die seuns te voorsien, hoewel sommige borge na vore gekom het om balle, doelnette, drankies, sportdrag en kos te skenk. Dit is egter steeds onvoldoende vir al ons behoeftes.”SOPKOMBUISDie gesin se bydrae strek egter verder as net sport. Hulle bedryf ook ’n sopkombuis vir die deelnemers en bied huisvesting.“Aanvanklik het ons hulle in ’n tent by ons klein huis gehuisves, maar ons het nou besluit om ’n toegewyde sportkoshuis te bou om hulle teen gure weer, veral tydens die reënseisoen, te beskerm. “Die seuns geniet die maaltye en sportaktiwiteite so baie dat dit ná toernooie dikwels ’n uitdaging is om hulle te oorreed om na hul nedersettings terug te keer,” vertel Emilie. Die projek bied tans sokkerakademies en jeugsokker aan vir vier spanne en daar is planne om in die nabye toekoms bykomende sportsoorte soos netbal en vlugbal in te sluit.Die impak van die inisiatief was duidelik tydens die openingsgeleentheid. Volgens Emilie was gemeenskapslede verheug om te sien hoe meer as 25 spanne van omliggende nedersettings, insluitend Amaupa, Onakatili, Omakange, Ongwena, Oluhalu, Okafa, Okalongo en Okahao, op Okatseidhi saamtrek. Die groei van die projek was egter nie sonder uitdagings nie. “Die seuns het dikwels nie behoorlike sokkerballe, uitrustings en stewels nie. Met ons eerste toernooi verlede jaar is een stel uitrustings deur meer as ses spanne gedeel en die beperkte aantal stewels wat ons gehad het, is deur meer as 15 spanne gebruik,” sê Emilie.FINANSIERINGOm akkommodasie vir die jong sokkerspelers te voorsien, bly ook ’n groot uitdaging. Die gesin het met hul eie fondse begin om ’n sportkoshuis te bou wat ten minste agt spanne op ’n slag kan huisves, maar is hoopvol vir ondersteuning met matrasse, beddens en beligting.Borgskappe word ook gesoek vir stewels, uitrustings, balle en pryse, insluitend trofeë, medaljes en verversings om die volgende toernooi moontlik te maak. Dit beloop sowat N$73 000.Indien bykomende borgskappe verkry word, sê Emilie, sal voorkeur gegee word aan behuising en uitrustings, stewels, balle en ook mediese toerusting. “Ons sal daarop fokus om akkommodasie te skep en beplan om infrastruktuur te bou wat ’n sopkombuis en ablusiegeriewe insluit. Behoorlike akkommodasie is noodsaaklik vir spanne wat van verafgeleë gebiede of dorpe af reis,” sê Emilie.Die 15-jarige Elly K. Alugodhi, hoofafrigter en ’n woordvoerder vir die projek, sê die jongmense het voor dié sportinisiatief bottels as tydelike doelpale gebruik. “Jy sou dikwels iemand tussen twee bottels sien staan wat as doelwagter optree en probeer keer dat ’n jong doelskieter die bal verby hulle skop,” onthou Elly. Sy het haar portuurgroep aangemoedig om verantwoordelikheid vir hul gemeenskappe te neem en aktief betrokke te raak.“Ons moet bewus wees van ons gemeenskappe se behoeftes en daarna streef om ons mede-inwoners met deernis te dien. “Ons is die leiers van môre en dit is ons plig om ons gemeenskappe in die regte rigting te stuur, ons omgewings te verbeter en geleenthede vir toekomstige geslagte te skep,” sê Elly.Vanjaar se jaarlikse toernooi vind van 27 tot 29 Desember 2026 in die Okatseidhi-nedersetting plaas. Sportspanne in Omusati en omliggende streke word aangemoedig om deel te neem en saam die talent uit landelike gebiede te vier. – loise@nmh-hub.com.na

Een sokkerbal op ’n slag

Kommentaar

Republikein 2026-09-30

Meld asseblief aan om kommentaar te lewer

Een sokkerbal op ’n slag

Kommentaar

Republikein 2026-09-30

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.