Byna helfte van Windhoekers bly in informele nedersettings

Stad Windhoek se uitvoerende hoof het kommer uitgespreek oor die uitermatige groei van informele nedersettings in die hoofstad. Volgens Moses Matyayi woon 224 000 inwoners, byna die helfte van Windhoek se bevolking, tans in onbeplande, ongedienste gebiede. Hy was Woensdag aan die woord tydens ’n vergadering met rolspelers waarvan Windhoek se burgemeester, Ndeshihafela Larandja, die gasvrou was. Dit was ook die bekendstelling van die munisipaliteit se laaste ronde van openbare konsultasies voordat die raad se vyfjaartermyn eindig. “Die stad het ’n jaarlikse bevolkingsgroei van 8,2% net in informele nedersettings aangeteken,” het Matyayi gesê. Hy het dié uitbreiding as beide ’n demografiese werklikheid sowel as ’n ontwikkelingsnoodgeval beskryf. DRUK OP BEHUISING, INFRASTRUKTUURDie styging in informele behuising vererger, volgens Matyayi, langdurige agterstande in dienslewering en plaas druk op stedelike infrastruktuur wat reeds kwesbaar is. Die hoofstad, die tuiste van meer as 486 000 mense, gaan voort om migrante wat op soek is na werk, onderrig en beter lewensomstandighede te huisves. Larandja het dié sentimente beaam en gesê die stygende stedelike armoede en druk op infrastruktuur “het ons uitgedaag om innoverend, proaktief en weerstandig te wees”.Die vergadering met rolspelers vorm deel van die verpligte openbare vergaderings wat vereis word deur die wet op plaaslike owerhede wat al tien kiesafdelings in Windhoek dek. Tydens die vergadering het beamptes van Stad Windhoek sleutelsuksesse en -struikelblokke gedeel wat tussen 2020 en 2025 ervaar is. SLAGGATEDie waarnemende hoof van infrastuktuurdienste, Rowan Adams, het op sy beurt gesê die munisipaliteit het N$353 miljoen bestee om slaggate te herstel wat deur die reënseisoen veroorsaak is. ’n Totaal van 26 000 slaggate in 650 strate is vanjaar herstel, terwyl twee beskadigde brûe se waterkanale (culverts) herstel is,” het Adams gesê.Ten spyte van die toenemende uitdagings insluitend finansiële beperkings, verouderde infrastruktuur en informele nedersettings wat oral opskiet, het Larandja die munisipaliteit se verbintenis tot inklusiewe ontwikkeling beklemtoon. “Windhoek beweeg vorentoe – danksy julle, saam met julle en vir julle,” het sy gesê. – republikein@republikein.com.na

Byna helfte van Windhoekers bly in informele nedersettings

Kommentaar

Republikein 2025-07-22

Meld asseblief aan om kommentaar te lewer

Byna helfte van Windhoekers bly in informele nedersettings

Kommentaar

Republikein 2025-07-22

Meld asseblief aan om kommentaar te lewer

MELD AAN

Advertensie