Aspersieplaas ‘hou nié die reën weg’

Ontstoke plaaseienaars en inwoners van Etunda en omliggende gebiede in die Onesi-kiesafdeling in die Omusatistreek het Vrydag gevra dat Otjimbele Asparagus sy bedrywighede by die Etunda-groenskema staak aangesien dit die reën weghou.

Die groep het later die klagskrif wat vra vir die sluiting van die projek teruggetrek, maar het volgehou die weerstasie by die projek is ’n instrument wat gebruik word om die reën “te vernietig”.

Die goewerneur van die Omusatistreek, mnr. Erginus Endjala, het Vrydag by Otjimbele Asparagus se besturende direkteur, mnr. Carlos Lerchundi, aangesluit om die doel van die toestel – wat volgens hom belangrik is vir die bedrywighede van die maatskappy – aan die betrokke groep te verduidelik.

Die projek, wat in 2018 teen ’n koste van N$25 miljoen by Ruacana van stapel gestuur is, het tans 320 mense in diens en in die spitsseisoen 600.

Endjala het onlangs tydens ’n telefoniese onderhoud met ons susterkoerant Namibian Sun gesê hy is bewus van die publiek se opvattings oor die saak, maar dié inligting is verkeerd.

Endjala het geskerts dit het die afgelope week op Outapi en Etunda gereën en geen hoeveelheid aspersies kon dit keer nie.

Hy het na die skeptici gekap en gesê pleks daarvan om bekommerd te wees oor Namibië se hoë werkloosheidsyfer en gepaardgaande armoede, is mense bekommerd oor dié tipe gerugte.

FOPNUUS “Hierdie misleidende inligting het in 2019 tydens verkiesingsveldtogte kop uitgesteek. Die persoon wat daardie inligting begin versprei het, wou die nasie verwar vir sy persoonlike belang. Hy praat net oor die nadele [van aspersies], maar nie die voordele daarvan nie,” het Endjala gesê.

Hy het inwoners van die streek wat ongelukkig oor die projek is, uitgedaag om die kantoor van die ombudsman te nader sodat die saak ondersoek kan word.

“Die persoon wat daardie aantygings begin het, is ’n openbare vyand wat probeer om spanning tussen die regering en die publiek te skep,” het hy gesê.

“Reëlings is met die ministerie van landbou getref om ’n span landbouwetenskaplikes te stuur om die weerstasie en die aspersiesplante te inspekteer.”

TOORDERY Lerchundi het ontken die aspersiesplaas het iets laat “installeer” om die reën te keer.

Hy het gesê die plaas het ’n weerstasie, wat noodsaaklik vir elke kommersiële boer is en dit word gebruik om daaglikse temperatuur, humiditeit en verdamping te meet.

Lerchundi het gesê dieselfde weerstasie is ook by die Etunda-plaas opgerig, wat deur die regering besit word.

“Ek kan nie iemand wat in toordery glo anders oortuig nie. Sommige mense wil die projek ondermyn deur vals aantygings te versprei dat ons iets het wat die reën weghou,” het hy gesê en bygevoeg hulle het baie reën by Etunda, Ruacana en Oshifo ontvang.

Hy sê 700 gesinne in die streek baat by dié plaas met meer as 400 mense wat daar werksaam is. Hieruit is die helfte permanente werknemers.

“Die 190 hektaar lewer tans ’n oes van sowat sewe ton aspersies, wat neerkom op meer as 180 ton per maand. Die oestydperk neem ses maande en begin in Januarie,” het Lerchundi gesê. – [email protected]