Angolese kinders wat bedel, ontstig Pohamba

Die voormalige staatshoof Hifikepunye Pohamba het sterk kritiek teen die Angolese regering uitgespreek wat sy landgenote versaak wat die grens met Namibië oorsteek met die doel om beeswagters of bedelaars op straat te word.

Pohamba wat aan die woord was tydens die Universiteit van Kuns, Wetenskap en Tegnologie (Nust) se gradeplegtigheid op Eenhana, sê die kinders wat op straat bedel, skets 'n negatiewe prent vir toeriste. Volgens hom sal toeriste tot die gevolgtrekking kom dat die kinders Namibiese burgers is wat hulle nie is nie. Pohamba sê hy het gehoop president Netumbo Nandi-Ndaitwah bring aan hom 'n hoflikheidsbesoek voordat sy na Angola vertrek, sodat sy sy kommer aan Angola se president Joao Lourenco kan oordra.

"Ek was onlangs langs die grens en ek sien Angolese kinders word die land ingebring om na bokke en beeste te kyk. Geen onderrig, maar hul stuur hul eie kinders skool toe. Kan ons nie hierdie situasie stop nie?" het Pohamba gevra.

"Iemand sou my vra of daar skole in Angola is. Jy kan nie die hele gebied sonder skole in Angola hê nie. Die kinders reis nou selfs van Angola na Windhoek om geld te bedel. Dié wat na ons land toe kom, sê ons kinders bedel geld. Natuurlik het ons 'n paar. Angolese kinders kom om te bedel en buitelanders sê dit is Namibiese kinders. Ek haat dit," het die voormalige staatshoof gesê. - [email protected]