Ali se Ark (Deel 2)

Ali Ryan en Corischna Grobler se doelwitte vir The ARK, ’n reddings- en rehabilitasiesentrum op Omaruru, strek soveel verder as om net diere te red, te rehabiliteer en nuwe tuistes te vind.“Ons glo daarin om ’n blywende verandering te maak. Daarom werk ons nou saam met organisasies soos Have-a-Heart Namibia (HAH) omdat ons net soos hulle glo dat onderrig en sterilisasie die sleutel is om die krisis in die land se dierewelsyn te takel,” verduidelik Ali. Die sentrum se span en hoofsaaklik Corischna, is ook aan die stuur van Have-a-Heart op Omaruru wat perfek sin maak, omdat hulle so nou saam met die gemeenskap werk.The ARK en HAH werk daarom saam met programme om diere te vang, te steriliseer en ’n liefdevolle tuiste voor te kry. Spesifieke dae word ook opsy gesit waartydens die gemeenskap die geleentheid het om hul diere vir sterilisasie en enige behandeling te bring. Hier word die koste van die behandeling en byvoorbeeld die sterilisasie deur HAH gedek, terwyl The ARK verantwoordelik is vir onderrig en enige dier aanvaar wat siek of beseer is of wat niemand meer wil hê nie, om te verseker die troeteldier ontvang die sorg wat hy of sy nodig het. Dié spesiale vennootskap help nie net om rondloperdiere te verminder nie, maar bemagtig ook plaaslike gemeenskappe om die leisels vir die welstand van diere oor te neem en sodoende ’n impak op die lang termyn te verseker. Ali en haar span werk ook nou saam met hul jonger gemeenskap waar onderrig ’n topprioriteit is. Deur inisiatiewe soos die “Inspire with the ARK”-skoolprojek, besoek hulle skole waar kinders geleer word oor verantwoordelike eienaarskap van ’n troeteldier, deernis en die belangrikheid daarvan om goedhartigheid teenoor diere te betoon. “Deur op hierdie noodsaaklike aspekte te fokus, hoop ons om ’n impak op die lang termyn te maak, die lyding van diere te versag en ’n toekoms te bou waar minder diere op straat beland,” sê Ali. TITAN, BLAZE, TUCKER EN TESSATans huisves die sentrum meer as 110 gesonde en gelukkige diere, elk met sy eie unieke storie. Van Titan,’n sesjarige Jack Russell wat ’n wonderlike metgesel vir ’n bejaarde persoon sal maak, tot Blaze en Tucker, twee skaaphondboeties wat op ’n plaas sal floreer.“Ons het ook sowat 15 babahondjies wat perfek is vir gesinne wat ’n spelerige toevoeging tot hul gesin en huis soek. “Moet ook nie vergeet van ons langtermyn-honde soos Tessa nie, wat al drie jaar by ons is en die perfekte maat sal wees vir iemand wat van ’n lekker lang staptog hou!”EARL EN PETRUSDie sentrum se katfamilie sluit die aantreklike Earl met sy grys strepe in wat al vir vier jaar vir sy vir ewig huis wag. Dan is daar Petrus, ’n “supervriendelike en liefdevolle” swart tienerkat, wat mal is oor speel en drukkies. In totaal het die sentrum meer as 50 katte en klein katjies, elkeen met sy of haar unieke persoonlikheid en wat wag vir iemand om hulle ’n kans te gee op ’n liefdevolle huis.“Elkeen van hierdie diere is spesiaal en hulle verdien elkeen ’n tweede kans,” sê Ali.Elkeen van die diere by The ARK wat gered en gereed is vir ’n nuwe tuiste is ten volle ingeënt, ontwurm, gesteriliseer en deur hul veearts vir goeie gesondheid afgeteken. Ali is vol lof vir die sentrum se diereversorger Petrus Dhiladhileni, wie se toewyding en passie hom ’n lid van onskatbare waarde vir hul span maak.“Hy bestee die meeste van sy tyd saam met die diere en ken en weet alles van hulle af – waarvan hulle hou, waarvan hulle nie hou nie en selfs hul perfekte en gunstelingplek om te krap!”Ali erken die rehabilitasie en die versorging van diere is baie duur. “Ons sou dit nooit alleen kon doen nie. Terwyl die meeste maande ’n werklik finansiële stryd is, is ons ongelooflik dankbaar vir die ondersteunende gemeenskap om ons.”The ARK is in die bevoorregte posisie om “ongelooflike en sterk verhoudings” te kon bou met die twee plaaslike staatsveeartse, drs. Mbitapi Ngaujake Kazarako en Estelle Oosthuysen, sowel as hul plaaslike private veearts dr. Lizelle van der Waal. “Hulle werk nou saam met ons om te verseker ons diere kry die beste sorg moontlik. Hoewel ons veeartsrekeninge 80% van ons algehele maandelikse koste uitmaak, is ons in staat om ons uitgawes te verminder deur baie van die siek en beseerde diere self te versorg met die voortgesette en noukeurige toesig van ons ervare veeartse. “Met die volgehoue hulp van ons veeartse kan ek en Corischna 24-uur-sorg by The ARK verskaf. Dit stel ons in staat om voortdurend enige siek of beseerde diere te monitor en natuurlik om vertroosting te bied.”Die sentrum het ook ’n inkopietrollie by Omarura se Spar waarin mense bydraes vir kat- en hondekos kan sit. The ARK ontvang ook vleisskenkings van Deep Catch en hondekos van Taeuber & Corssen, wat baie help om die diere te versorg. “Elke bietjie ondersteuning, of dit nou finansieel of ’n eenvoudige daad van omgee is – ’n kombers om ’n weggooidier warm te hou, ’n sak hondekos vir ’n honger magie of ’n helpende hand wat voorrade op- en aflaai – maak ’n verskil.”Ali en haar span hoop namate die woord oor die sentrum versprei, dit sal lei tot meer skenkings, aannemings en ondersteuning in die algemeen sodat hulle kan voortgaan om ’n verskil in die diere se lewens te maak. Sy erken sy word dikwels gevra wat die grootste struikelblok in die wel en weë van die sentrum is. Ali se antwoord is altyd dieselfde. Dit is nie hoe oorwerk hulle is nie. Dit is nie die siek, mishandelde, wees- of rondloperdiere waarmee hulle in aanraking kom nie. Dit is ook nie die oorweldigende aantal behoeftige diere in Omaruru, Karibib, Usakos en die omliggende nedersetting of Namibië as geheel nie. Dit is nie eens die voortdurende stryd om genoeg finansiering te verseker of die feit dat hulle meeste maande moet skraap om net die basiese koste te dek nie. Die grootste struikelblokke is mense se ingesteldheid, beklemtoon sy. “’n Gebrek aan bewustheid oor verantwoordelike eienaarskap van ’n troeteldier is algemeen oor alle vlakke van die samelewing en dit is waar die werklike kwessie lê.” Mense is vinnig om vinger te wys, maar die werklikheid is dat talle tot die probleem bydra, sê Ali.Katjies kan dragtig word so vroeg as op vier maande oud en hondjies as hulle maar ses maande oud is.“Hoe meer diere geteel word, hetsy bewustelik of per ongeluk, hoe minder vind diere wat gered word ’n tuise. Dit beteken hulle moet langer in hokke deurbring en dit verhoog verder die aantal diere wat onnodig uitgesit moet word.”Elke werpsel dra by tot die siklus van lyding – meer rondloperdiere op straat, meer diere wat wees gelaat word en meer skuilings wat ver verby hul kapasitiet gedruk word. Sonder ordentlike onderrig, sterilisasie en verantwoordelike eienaarskap sal die krisis net voortduur, maan Ali. “Verandering begin by elkeen van ons wat die regte keuses maak – die sterilisering van troeteldiere, om eerder ’n troeteldier aan te neem as om een te koop waar moontlik en om bewustheid te skep oor die werklikheid van die oorbevolking van diere.”By die sentrum is meer as genoeg diere wat al vir tot vier jaar desperaat wag vir ’n gesin om hom of haar aan te neem. Dit is egter selde dat hulle meer as twee aannemings per maand het, sê Ali. Dit terwyl hul tien keer soveel in dieselfde tyd red.As ’n organisasie wat net genadedood as ’n absolute laaste uitweg gebruik en soos in die gevalle van onbehandelbare siektes, breek dit haar hart om selfs net daaraan te dink om ’n gesonde hond te laat uitsit om weer meer ruimte te skep. “Ek is dankbaar dat ek nog nie daardie besluit moes maak nie, maar met 60 honde en elke enkele hok wat vol is, kan ek nie help om te wonder watter ander opsies oorbly nie?”*Vir meer inligting oor The ARK en sy diere, besoek die webtuiste thearkrescuenamibia.org of hul Facebookblad The-ARK-Rescue-and-Rehabilitation

Ali se Ark (Deel 2)

Kommentaar

Republikein 2025-11-03

Meld asseblief aan om kommentaar te lewer

Ali se Ark (Deel 2)

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.