Akwarium se deure toe tot einde 2024

Die akwarium op Swakopmund se deure sal die feestyd gesluit wees om broodnodige herstelwerk te verrig.Die proses kan moontlik tot einde volgende jaar duur.“Dit is teleurstellend dat die akwarium gedurende die 2023-’24-vakansieseisoen gesluit moet wees. Die rehabilitasie van die akwarium en die veiligheid van ons besoekers is egter in die stadium ons prioriteit,” het die woordvoerder van die ministerie van visserye en mariene hulpbronne, Uaripi Katjiukua, aan die koerant gesê.Katjiukua sê die ministerie kan nie met sekerheid sê hoe lank die akwarium gesluit sal wees nie, aangesien die interne betonstruktuur die meeste herstelwerk benodig.Die omvang van die strukturele skade kan volgens Katjiukua eers bepaal word wanneer die beskadigde areas oopgemaak word en die beste rehabilitasieprosedures geïdentifiseer word. “Die akwarium sal vir ’n lang tydperk gesluit wees; vir ’n paar maande of selfs tot die einde van 2024,” volgens Katjiukua.Die ministerie wat aan die stuur van die akwarium is sedert sy inwyding in 1995, is egter vol vertroue dat die beplande herstelwerk en rehabilitasie die akwarium se lewensduur sal verleng.Katjiukua sê die koste van die herstelwerk kan eers bepaal word nadat die beskadigde areas oopgemaak is, die omvang van die skade bepaal word en die beste rehabilitasieprosedures geïdentifiseer is.“Jare se blootstelling aan seewater het skade aan baie van die eksterne en interne betonstrukture sowel as die staalstaaf in die beton veroorsaak.”LAAT SOMMIGE VISSE VRYDie hooftrekpleister van die akwarium is die ovaal tenk met ’n kapasiteit van 320 000 liter seewater en ’n tonnel van agt meter. Die tenk huisves die meeste plaaslike visspesies, insluitend kabeljou, leervis, galjoen, steenbras en kolsterte, sowel as ’n gespikkelde sloephaai, pylstert en ’n groen seeskilpad.Die ministerie sê hy sal sy bes doen om die uitstalling by die akwarium in stand te hou, maar die hooftenk sal waarskynlik gedreineer moet word.“Wanneer daardie tyd aanbreek, sal die skaars spesies in ons kwarantyngebied gehou word, maar die meeste van die meer algemene spesies sal in die see vrygelaat moet word,” het Katjiukua gesê.HERSTELWERKDie 11 betonpilare rondom die hooftenk sal vervang word, asook die betonmure van die hooftenk en die seël tussen die boonste vloer en die hooftenk. Die kamer met onder meer die akwarium se pompe, filters en elektriese kontrolepaneel se betondak en vloer sal vervang word.Verder sal die houtstrukture van die plafon en uitstallings, die betonstruktuur van die rotskreeftenk en die dakstrukture aan die buitekant van die gebou herstel word. Die droë uitstallings, klein tenks en inligtingskerms sal ook opgegradeer word.“Die ministerie is in ’n gevorderde stadium van konsultasie met die ministerie van werke en vervoer, en spesifikasies van die siviele, elektriese en meganiese werke aan die pilare en operasionele aanleg van die akwarium is saamgestel.” – kristien@republikein.com.na

Akwarium se deure toe tot einde 2024

Kommentaar

Republikein 2026-01-12

Meld asseblief aan om kommentaar te lewer

Akwarium se deure toe tot einde 2024

Kommentaar

Republikein 2026-01-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.