’n Blink toekoms vir Needy Hearts-sopkombuis

’n Inisiatief gelei deur regstudente aan die Universiteit van Namibië (Unam) hoop om die Needy Hearts-sopkombuis in Hakahana in Windhoek met hul hulp in ’n selfonderhoudende niewinsgewende organisasie te omskep. Socrates Law Firm wil sodoende die sopkombuis in staat stel om volgehoue ondersteuning en maaltye aan behoeftiges en in besonder kinders te verskaf. “Ons sien ’n blink en volhoubare toekoms vir die sopkombuis wanneer ons projek voltooi is,” het ’n verteenwoordiger van die Socrates Law Firm gesê.Die projek sluit in die uitbreiding van die kombuis se werksaamhede na elke naweek om sodoende voortgesette ondersteuning aan die gemeenskap te kan bied. Buiten vir die voorsiening van maaltye, is die plan ook om programme aan te bied wat fokus op onderrig, lewensvaardighede asook toegang tot noodsaaklike dienste.“Ons glo dat diè pogings nie net in die onmiddellike behoeftes sal voorsien nie, maar ook positiewe en langtermyn-uitkomste sal verseker, en ook individue en families sal bemagtig om meer selfversorgend te raak,” het die verteenwoordiger gesê.Die projek hoop ook om belangrike waardes in die gemeenskap en veral onder kinders vas te lê.“Die verwagte impak van die projek op die Hakahana-gemeenskap en veral die kinders en families wat deur die sopkombuis bedien word, is om waardes soos higiëne en welstand vas te lê. “Ons wil ook die gees van Ubuntu versprei en aan seuns meisies die waarde leer om 'nee' vir seks te sê voor hulle gereed is, om tienerswangerskappe te vermy.”Die span van Socrates Law Firm sal die sukses van die inisiatief meet aan die hand van die terugvoer van begunstigdes en vrywilligers, die volhoubaarheid en kapasiteit van die sopkombuis evalueer en ook bepaal tot watter mate die gemeenskap hierby betrokke is. “Deur die antwoorde hierop te kombineer, sal ons ’n omvattende oorsig van die impak van ons pogings op die sopkombuis en die begunstigdes hê,” het die span verduidelik. Socrates Law Firm wil ook hande vat met plaaslike besighede om hul droom vir die sopkombuis te verwesenlik. “Benewens die hulp van vrywilligers, is ons op soek na besighede en individue wat finansiële ondersteuning en skenkings kan bied.“Ons doel is om ’n ondersteuningsnetwerk te skep wat die volhoubaarheid en groei van die sopkombuis op die lang termyn kan verseker.”Een van die uitdagings wat die sopkombuis tans ervaar, is dat dit nie as ’n niewinsgewende organisasie kan registreer nie weens sekere sleutelvereistes wat nie nagekom is nie.“Daar is nie aan sekere sleutelvereistes vir Afdeling 21-organisasies voldoen nie, wat ’n demper geplaas het op ons vermoë om met die registrasie voort te gaan. “Ons bly egter daartoe verbind om Maria Savage deur die proses te lei om te verseker dat die kombuis wettiglik vir skenkings kan vra en binne die raamwerk van die wet bedryf kan word.”Die span se raad aan studente wat ook graag ’n inisiatief van stapel wil stuur, is om ’n duidelike visie te hê.“Bou ’n sterk span, betrek die gemeenskap, soek vennootskappe, fokus op volhoubaarheid, wees aanpasbaar, meet jou impak en hou by jou waardes.” – republikein@republikein.com.na

’n Blink toekoms vir Needy Hearts-sopkombuis

Kommentaar

Republikein 2025-11-05

Meld asseblief aan om kommentaar te lewer

’n Blink toekoms vir Needy Hearts-sopkombuis

Kommentaar

Republikein 2025-11-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.