Uis sprei sy vlerke

Die sewende Uis Fly In is verlede naweek in dié dorp by die Brandberg gehou. Om deel van die gewilde geleentheid te wees, het Martin en Milly Venn vanaf die Morningstar-vliegveld in Kaapstad tot op Uis gevlieg. Die Venn-egpaar het die rit met ’n Kitfox, ligte sportvliegtuig, meegemaak. Dit het hulle 23 ure oor vyf dae geneem om Uis te bereik. Sterk winde van voor het hul vliegspoed belemmer.Nóg drie vliegtuie het van Suid-Afrika gevlieg terwyl vliegtuie ook van Duitsland en Switserland op Uis toegesak het om deel van die naweek se verrigtinge te wees.Die oorgrote meerderheid vliegtuie was egter van Namibië.Altesaam 32 vliegtuie, insluitend twee helikopters en een girokopter, het aan verskillende kompetisies deelgeneem. Dit het vir pret en vermaak gesorg.Die Light Sport and Amateur Build Aircraft Association of Namibia (Lisama) het die geleentheid aangebied en me. Heidi Snyman en dr. Henk Koster het die kompetisies en die geleentheid georganiseer.Sestien vliegtuie het aan die presisienavigasie-oefening deelgeneem. Tydens dié oefening moes vlieëniers langs ’n uitgesoekte roete vlieg en dié roete in die vasgestelde tyd vlieg. Hulle moes om elke rigtingspunt navigeer en vir die hele roete op koers bly. As die vlieënier ’n punt of die tydsberekening verkeerd kry, het dit teen die vlieënier getel en sy algehele puntetelling beïnvloed. Dawid Francis (V5-LCE) het eerste plek behaal, Matthias Röttcher (V5-UVR) was tweede en Dirk Reich (V5-UKW) derde. Tien vliegtuie het aan die kollanding-kompetisie deelgeneem. Vlieëniers moes hulle vaardighede gebruik om hul vliegtuig so na as moontlik aan die landingslyn te land. Vlieëniers het punte verloor vir elke meter wat hulle voor of agter die lyn geland het. Dirk Reich (V5-UKW) het die eerste plek ingepalm, Matthias Röttcher (V5-UVR) was tweede en Izak Kotze (V5 EMI) derde. Die algehele wenner van die naweek was Matthias Röttcher gevolg deur Dirk Reich. Detlef Klein (V5-UYP) en Martin Venn (ZU- AJL) het die derde posisie gedeel. Peter Keil is as die man met die beste radioprosedures aangewys en Kai Rubow het die prys vir die beste lugmanskap ingepalm. Fly In is vir tien jaar by die Rostock Ritz Lodge in die Suide aangebied en word die afgelope sewe jaar op Uis gehou. – tanja@republikein.com.na

Uis sprei sy vlerke

Kommentaar

Republikein 2026-06-11

Meld asseblief aan om kommentaar te lewer

Uis sprei sy vlerke

Kommentaar

Republikein 2026-06-11

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.