Nog ’n brand woed oos van hoofstad

’n Veldbrand het gister in die berge oos van Windhoek gewoed.

Dit nadat ’n brand Dinsdag teen etenstyd aan die buitewyke van Windhoek by die Avisdam uitgebreek het.

Ongeveer 30 brandbestryders het omtrent sewe ure lank geswoeg om dié brand te blus wat etlike hektaar verwoes het.

Me. Vera Freyer, voorsitter van Greenspace, het gister in ’n WhatsApp-boodskap gesê die vloedvlakte na die spoorwegbrug en die ingang na die Gobabis-pad is heeltemal afgebrand.

Sy het mense versoek om vir ’n paar dae nie na die dam te kom nie, totdat die vuur geblus en die rook weg is. Sy het gesê tot dusver is die noordelike kant van die dam nie geraak nie.

Greenspace is ’n niewinsgewende omgewingsorganisasie wat as die “Vriende van Avis” na die bestuur en bewaring van die Avisdam omsien.

’n Senior beampte van die Windhoekse brandweer, mnr. Jeffrey Mayanga, het Dinsdag gesê verskeie besighede in die omgewing is nie deur die brand geraak nie.

“Hulle kon die brand in die rivierloop keer,” het hy gesê.

– [email protected]