NMH besoek DeepSea Mira

Die reuse- semi-dompelbare olieboor DeepSea Mira lê buite die Walvisbaaise hawe en wag vir werk. Die Mira, wat deur Noorweë se Odfjell Drilling bedryf word, het die vermoë om sy posisie tot binne net 15 cm te behou, ongeag wind of weer, getye of golwe. Altesaam 41 Namibiërs vorm deel van die Mira se bemanning van 115 lede, terwyl bykomende Namibiërs as derdeparty-diensverskaffers ook op die olieboor werk, om dié wêreldklastegnologie-olieboor in topkondisie te hou. Volgens Arne Jacobsen, die uitvoerende hoof van eienaars Northern Ocean (NOL), het die Mira die afgelope twee jaar die meerderheid olie-eksplorasieboorgate in Namibiese waters geboor. “Hierdie stabiliteit het ons in staat gestel om beduidend in Namibiese talent te belê, met byna 40% van ons buitelandse bemanning wat nou plaaslik is,” het hy gesê, en “voortgesette boorwerk is noodsaaklik vir Namibië en NOL om hierdie momentum te behou.” Network Media Hub (NMH) het Vrydag die eksklusiewe geleentheid gehad om die Mira te besoek. Skandeer die QR-kode vir ’n toer en om na die Namibiërs aan boord te luister. Foto Augetto Graig