Namibië vier Maandag 32 jaar van onafhanklikheid

Namibië is Maandag 32 jaar oud en die regering vier die geleentheid by the Vineta-stadion in Swakopmund.

Volgens die uitvoerende direkteur van inligting en kommunikasietegnologie, mnr. Mbeuta Ua-Ndjarakana, het die regering op die Vineta-stadion besluit waar die staatshoof, president Hage Geingob, sy toespraak sal lewer.

Die feesvieringe sal onder streng Covid-19-regulasies plaasvind, en slegs uitgenooide gaste kan die geleentheid bywoon weens die beperking van nie meer as 1 000 mense wat by byeenkomste mag bymekaarkom nie.

Ua-Ndjarakana sê die genooide gaste sluit onder meer kerkverteenwoordigers, streekgoeweneurs, sakelui, tradisionele leiers, jeugleiers, verteenwoordigers van politieke partye, lede van die diplomatieke korps, vakbondleiers, lede van die parlement en kabinetsministers in.

Hy is nie bewus van enige spesifieke hooggeplaaste buitelandse burgers wat genooi is nie.

Die program skop vanaf 06:00 af en die nasionale uitsaaier sal die dag se gebeure regstreeks op televisie en radio uitsaai.

Die ministerie sal dit ook op sy sosiale media uitsaai terwyl plaaslike media kan registreer om die vieringe by te woon.

“Die ministerie moedig alle Namibiërs aan om die verrigtinge te volg,” luidens ’n amptelike vrystelling.