Langs die kampvuur

As ek saans met my maats om die kampvuur sit, dan klop my hart van puur genot, lui die kampliedjie uit toeka se dae. Dít is die vrolike samesyn tussen, boere, vriende en vreemdelinge waarna besoekers aan die NLU Agribraai 2026 op 10 en 11 April by die Gobabis-skougronde kan aansien. Die tema vanjaar is “Langs die kampvuur.” Benewens die gevestigde braaikompetisie is die program uitgebrei om ’n damesoggend, ’n wildveiling en ’n verskeidenheid vermaak vir oud en jonk in te sluit. Vrydag se verrigtinge skop af met die amptelike bekendstelling van al die braaispanne, gevolg deur ’n skaapkop-ete, ’n tradisionele delikatesse. Kaartjies vir die ete is beperk en moet vooraf bespreek word. Die hekke vir braaispanne swaai Vrydag om 07:00 oop vir die opstel van stalletjies. Die braaikompetisie sal volgens ’n verspreide wegspringstelsel plaasvind. Elke span trek ’n tydgleuf en ontvang dan ’n boks met verpligte bestanddele. Spanne moet mooi beplan om binne vier uur ’n voorgereg, hoofgereg en nagereg vir drie beoordelaars voor te berei. Slegs hout of houtskool mag vir gaarmaak gebruik word; die gebruik van gas of elektriese toestelle is nie toelaatbaar nie. Die verpligte hoofbestanddeel is kruisskyf (rump steak), terwyl die oorblywende bestanddele eers op die dag bekend gemaak sal word. Die geliefde Namibiese sjef en organiseerder van die beoordelaars, Sanet Prinsloo, is alombekend daarvoor om braaiers se beplande resepte omver te gooi met haar geheime bestanddele. PROGRAMVolgens die wenner van verlede jaar se braaikompetisie, Sonop Boerevereniging, sal Saterdag se program saam met die braaikompetisie aangebied word en sluit die volgende in: • ’n Damesoggend met Left Sleeve, ’n Suid-Afrikaanse motiveringspreker; • Die eerste wildveiling, aangebied in samewerking met Agra en Du Preez Wild as ’n katalogusveiling; • Uitstallers uit die breër landbousektor; • ’n Kinderspeelgebied met springkastele en aktiwiteite; • Musiekvermaak met plaaslike kunstenaar Danie Prinsloo wat Vrydagaand en gedurende Saterdag sal optree, asook die Kaufee Kapelle wat Saterdagaand die voete sal laat jeuk. SKRYF SO IN • Inskrywings sluit op 28 Februarie 2026. • Maksimum tien spanne elk per kategorie vir boereverenigings en sosiale spanne. • Spanne bestaan uit vier lede. Die inskrywingsfooi vir boereverenigings is gratis en N$1 000 vir sosiale spanne. Die algehele wenner van die boereverenigings stap met N$20 000 weg en die wenner van die sosiale spanne kan N$10 000 inpalm. Daar kan met nog pryse weggeloop word vir onder die meer die beste voorgereg, hoofgereg en nagereg en ander kategorieë. HEKFOOIE • Kinders onder 6: Gratis; • Skoolkinders en pensioenarisse: N$30 per dag; en• Volwassenes: N$100 per dag of N$150 vir twee dae. Spanne en uitstallers kan by nluagribraai2026@gmail.com registreer. Rig navrae oor oor braaispanne by Cheryll Pienaar by 081 292 5086 en uitstallers by Johan van Niekerk by 081 129 9761.– francoise@nmh.com.na

Langs die kampvuur

Kommentaar

Republikein 2026-07-31

Meld asseblief aan om kommentaar te lewer

Langs die kampvuur

Kommentaar

Republikein 2026-07-31

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.