Napha: Namibië steeds oop vir trofeejag

Nuusredaksie

Dit gaan moeilike tye vir Namibië wees en die laaste ding wat die land nodig het, is verkeerde inligting oor bek-en-klouseer (BKS) wat verdere ekonomiese swaarkry veroorsaak.

Dit is die boodskap van die president van die Namibië Professionele Jagtersvereniging (Napha), Hannes du Plessis, te midde van die uitbreking van BKS in Namibië. 

“Laat ons baie duidelik wees: Namibië bly oop vir jag,” het hy in ’n mediaverklaring gesê.

Die huidige BKS-beperkings verbied nie trofeejag nie, volgens Napha. Dit raak hoofsaaklik die beweging van vee en sekere dierprodukte, insluitend die vervoer en uitvoer van jagtrofeë. 

“Hoewel jagters vertragings kan ervaar om hul trofeë te ontvang weens veeartsenykundige behandeling, kwarantyn en uitvoervereistes, beteken dit nie dat jagbedrywighede gestaak is of dat Namibië nie meer ’n geskikte jagbestemming is nie,” het Du Plessis gesê.

Ander Afrikalande dien as voorbeelde wat wys dat trofeejag selfs in streke kan funksioneer waar BKS endemies is, het Napha aangevoer. Namibië self bied voorbeelde hiervan, soos die Zambezistreek, waar jag volgens hulle suksesvol voortgegaan het ondanks sy BKS-status.

Die jagtersvereniging voer selfs aan dat trofeejag nou belangriker as ooit is: “Vir baie jagondernemings verteenwoordig die verkoop van wildsvleis ’n belangrike bron van inkomste naas jagtoerisme. 

“Met die huidige beperkings wat vleisverkope en beweging raak, het inkomste wat deur jagtoerisme gegenereer word, selfs belangriker geword,” het Du Plessis gesê. 

“In ’n tyd wanneer een belangrike bron van inkomste ernstig beperk is, kan Namibië dit nie bekostig om nog een te verloor weens onakkurate inligting nie.”

Hoewel die nakoming van nodige veeartsenykundige maatreëls noodsaaklik is, beklemtoon Napha dit is ewe belangrik om te onderskei tussen beperkings op die beweging van dierprodukte en die voortgesette werking van die jagbedryf. 

“Om internasionale jagters te ontmoedig om Namibië te besoek op grond van misverstande oor hierdie beperkings, sou bykomende en onnodige druk plaas op ’n bedryf wat reeds aansienlike uitdagings in die gesig staar,” het die president gesê.

Napha het ’n beroep op internasionale jagverenigings, besprekingsagentskappe en jagondernemings gedoen om huidige jaggeleenthede duidelik aan hul kliënte te kommunikeer.

– [email protected]