Groenbrandstofaanleg van N$17 mjd. beplan vir Henties

’n Aanleg ter waarde van N$17 miljard, wat sonkrag sal gebruik om groen waterstof en ammoniak vir uitvoer na Europa te produseer, word aan die oostelike rand van Hentiesbaai beplan.CMMZE Energy Namibia beplan om in 2027 met konstruksie en in 2030 met uitvoere te begin. Na verwagting sal die projek ongeveer 550 werksgeleenthede tydens die konstruksiefase en 200 permanente poste skep.“Ons glo dit sal tot ’n beduidende afname in werkloosheid in Hentiesbaai en die Erongostreek in sy geheel bydra,” het direkteur Trevor Brockerhoff aan Republikein gesê.Volgens hom sal die maatskappy ook bydra tot opleiding en die oordrag van vaardighede in die bedryf.Hentiesbaai het ’n beraamde permanente bevolking van 7 000 tot 8 000 inwoners. Die kusdorp se ekonomie is afhanklik van toerisme en ontspanningshengel en gaan gebuk onder hoë werkloosheid. ’n Sonkragaanleg van 800 megawatt, toegerus met batteryberging, sal ’n elektroliseerder aandryf wat water in waterstof en suurstof verdeel. Die waterstof sal op die perseel in ammoniak omgeskakel, teen -33 °C gestoor en na Europa verskeep word. Die maatskappy beoog om jaarliks ongeveer 210 000 ton groen ammoniak te produseer.Lande wat koolstofvrystellings van swaar nywerhede en die skeepvaartbedryf wil verminder, wend hulle tot groen waterstof en verwante produkte. Baie van die lande beskik egter nie oor genoeg hernubare energie om dit self te produseer nie. Die projek beoog om Namibië se sonlig en kuslyn te benut om in dié mark te voorsien.Die aanleg sal 1 087 hektaar – sowat 11 vierkante kilometer – van die munisipale grond suid van die dorp se lughawe beslaan. Hentiesbaai se dorpsraad het in November 2022 ’n resolusie oor die projek aanvaar en die terrein is in November 2025 verhuur.Die ministerie van die omgewing, bosbou en toerisme het in September ’n omgewingsklaringsertifikaat vir die projek uitgereik. Die sertifikaat is steeds in die naam van Ugab Power Reserve – die maatskappy se vorige naam – totdat die ministerie die verandering amptelik aanteken.CMMZE Energy Namibia is in besit van CMMZE Invest wat aan die skeepvaartmagnaat dr. Aldo Labia behoort, Chekai Investments wat aan dr. Harry Gonteb behoort en dan Brockerhoff. Ontwikkelingskoste is tot dusver intern gefinansier, met Labia wat die finansiering van die projek fasiliteer.Die maatskappy sal sy eie skepe vir die vervoer van ammoniak bedryf. Volgens Brockerhoff is dié skepe reeds bestel en sal dit in 2028 in gebruik geneem word.Watervoorsiening vir die projek moet nog bevestig word. Die aanleg sal water uit NamWater se Omdel–Swakopmund-grootmaatstelsel deur middel van ’n nuwe aansluiting verkry, mits NamWater bevestig dat die nodige voorraad beskikbaar is. ’n Vroeëre plan vir ’n ontsoutingsaanleg vir seewater is laat vaar.Die uitvoerroete moet ook nog goedgekeur word. Die ammoniak sal verskeep word vanaf ’n drywende aanlêplek voor die kus van Hentiesbaai, wat deur ’n pyplyn met die aanleg verbind is. Die aanlêplek en pyplyn vorm die projek se tweede fase en vereis ’n afsonderlike omgewingsimpakstudie en goedkeuring.Luidens die projek se omgewingsimpakstudie kan dit werksoekers van buite die gebied lok en beveel aan dat plaaslike inwoners voorkeur vir indiensneming geniet. – adam@erongo.com.na

Groenbrandstofaanleg van N$17 mjd. beplan vir Henties

Kommentaar

Republikein 2026-11-03

Meld asseblief aan om kommentaar te lewer

Groenbrandstofaanleg van N$17 mjd. beplan vir Henties

Kommentaar

Republikein 2026-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.