Verkoop van smelter in die kollig

Die koopooreenkoms tussen Dundee Precious Metals en China se Sinomine Resources Group vir die eienaarskap van die kopersmelter op Tsumeb, is weer in die kollig nadat sakelui ’n deel van die opbrengs eis. Die Namibiese Mededingingskommissie (NaCC) moet nog die verkooptransaksie goedkeur. Die Tsumeb-sakekonsortium het die kommissie genader en dring daarop aan dat die uitstaande kwessies getakel moet word voor Dundee toegelaat word om Namibië te verlaat.Die konsortium se uitvoerende hoof en voormalige parlementslid, Engel Nawatiseb, dring daarop aan die regering moet Dundee aanspreeklik hou vir omgewingskade en veral dat arseen steeds op die smelter se perseel gestoor word. “Elke inwoner op Tsumeb moet medies vir arseen ondersoek word,” sê Nawatiseb. Daar is ook eise van huidige en voormalige werknemers van die smelter weens blootstelling aan en beserings weens arseen wat steeds nie afgehandel is nie.Nawatiseb sê Dundee het Greyhorse Mining ook ’n 10%-aandeel in die smelter belowe in ’n koopkontrak vir die plaas Kameelputt nommer 278, wat nooit nagekom is nie.“Hulle is besig om die smelter te verkoop en weg te hardloop,” sê die voormalige adjunkminister van inligting en kommunikasietegnologie.Volgens Nawatiseb se brief verteenwoordig die sakelui ook Tsumeb se gemeenskap en nasate in hul soeke na geregtigheid vir die omgewingskade wat veroorsaak is deur arseen en chemikalieë wat in die dorp en omgewing gestort is. Hy het ook sy kommer uitgespreek oor wat met die bestaande arseendam gaan gebeur wanneer Dundee die land verlaat. Intussen is die omgewingsaktivis en voorsitter van EarthLife Namibia, Bertchen Kohrs, dit eens dat arseen die grootste kommer oor die smelter wek. Kohrs sê Dundee het die smelter in 2010 gekoop onder die voorwaarde dat die maatskappy wat in Kanada genoteer is, nie vir historiese besoedeling verantwoordelik is nie.Nietemin het Dundee reeds vanaf 2007 die smelter gebruik om kopererts van Chelopech in Bulgarye, wat ryk is in arseeninhoud, in Tsumeb te smelt. Hoewel dié spesifieke erts nie meer sedert Januarie ingevoer word nie, voer Dundee erts van Peru en ander Suid-Amerikaanse lande in wat ook arseen bevat. Die Tsumeb-smelterproses, een van die enigste op aarde waar komplekse kopererts verwerk word, stel volgens Kohrs arseentrioksied as afvalproduk vry. Die berging van die arseentrioksied in groot goiingsakke op die perseel is ’n reusebron van kommer aangesien die wind die stof uit oop en stukkende sakke wyd versprei, volgens haar. Earthlife het in 2016 ’n verdoemende verslag – Dirty Precious Metals – vrygestel en die regering en Dundee aangemoedig om Tsumeb se grond te suiwer voordat die historiese besoedeling tot by die grondwatervlak sak en ’n einde aan Tsumeb bring.Vrae aan Dundee was teen druktyd nog onbeantwoord. Die NaCC se woordvoerder, Dina //Gowases, kon wel bevestig dat die kommissie nie die koopkontrak opgeskort het nie. Sy erken dat die kommissie Nawatiseb se brief ontvang het. Sy sê egter dit is deel van die gewone proses en dat ander belanghebbers ook die NaCC kan nader.Die ondersoekproses duur voort en die NaCC sal ’n afvaardiging na Tsumeb stuur om die kwessies persoonlik te bespreek, en om ook met albei partye wat by die kooptransaksie betrokke is, te vergader, sê sy. “Die partye sal ’n geleentheid kry om te reageer en daarna sal ons sien of daar ander kwale is. Ons mag selfs ’n belanghebberkonferensie reël as dit nodig is,” voeg sy by.Indien daar gevind word dat die bekommernisse van Tsumeb se inwoners geldig is, en as die transaksie steeds voordelig is vir die ekonomie en die betrokke sektor, kan die NaCC steeds die koopooreenkoms met voorwaardes goedkeur, brei sy uit.In daardie geval sal ’n handhawingsprogram van stapel gestuur word, om te verseker dat die voorwaardes nagekom word, en indien nie, kan toestemming vir die transaksie steeds teruggetrek word, sê //Gowases. – augetto@republikein.com.na

Verkoop van smelter in die kollig

Kommentaar

Republikein 2025-11-03

Meld asseblief aan om kommentaar te lewer

Verkoop van smelter in die kollig

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.