Tsumeb-smelter (vir eers) gesluit

Die Chinese eienaars van die Tsumeb-smelter, die Sinomine Resources-groep, het aangekondig dat die aanleg tydelik gesluit is. In 'n vrystelling sê die groep se uitvoerende hoof Loggan Lau kopersmeltingsbedrywighede sal tydelik onderbreek en die aanleg onder instandhouding geplaas word, totdat die mark verbeter. Die smelter se woordvoerder Alina Garises het by navraag gesê die smelter het tans 600 voltydse werkernemers in diens. Volgens Sinomine ervaar die globale mark vir koper tans toenemende smeltkapasiteit in groot koperproduserende streke wat tot aansienlike oorkapasiteit lei.“Dit het gelei tot 'n tekort aan koperkonsentraat wat druk plaas op smelters wêreldwyd, insluitend Tsumeb. Gevolglik het behandeling- en raffineringskoste (TCRC's) gedaal, wat operasionele volhoubaarheid beïnvloed,” lui Sinomine se verklaring.Die maatskappy mik nou na 'n algehele kostevermindering van 30 tot 40%. As deel van die oorgang sal 'n proses vir die aansoek van vrywillige skeiding vir werknemers begin. Garises het gesê dit beteken nie noodwendig 'n fokus op die besnoeiing van net arbeidskoste nie, maar eerder 'n algehele verlaging van onkoste. Die beplande proses is egter deur die Mynwerkersunie van Namibië (MUN) verwerp. Volgens die MUN se algemene sekretaris Filleppus George Ampweya is Sinomine besig met ‘n gebrekkige prosedure wat in weerwil is van Namibië se verbintenis tot werkskepping, ordentlike werk en die beskerming van Namibiese werkers. Ampweya het Vrydag aan Netwerk Media Hub (NMH) bevestig dat die vakbond nog geen amptelike kennisgewing van die afleggings ontvang het nie. Volgens hom is dit ‘n doelbewuste poging om die MUN se rol te ondermyn en die erkenningsooreenkoms tussen die smelter en die vakbond te skend. Hy het ook die informele en onreëlmatige konsultasieproses verwerp wat glo betekenisvolle onderhandeling uitsluit. “Ons pogings om in goeder trou gestruktureerde onderhandelinge te bewerkstellig, is met eensydige prosesse begroet wat die vakbond soos 'n toeskouer behandel," het Ampweya gesê. Hy het die vergaderings tot dusver as "oneerbiedig" beskryf en wat die vakbond uitsluit en magteloos maak in besluite wat die toekoms van sy lede direk raak. In 'n brief aan die adjunk- eerste minister en minister van nywerheidsontwikkeling, myne en energie, Natangwe Ithete, eis die MUN dat formele onderhandelinge met die vakbond onmiddelik begin, dat die tydperk vir die aansoek vir vrywillige skeidingsooreenkomste tot twee jaar verleng word, en dat volledige deursigtigheid met betrekking tot die toekomstige struktuur, personeelmodel en vaardigheidsvereistes toegepas word.“Ons verwerp enige plan om Namibiese werknemers te marginaliseer onder vae en ongegronde kriteria en ten gunste van buitelandse burgers,” lui die brief wat ook aan die minister van justisie en arbeidsverhoudinge Wise Immanuel gerig is. Ampweya het ook vir 'n vergadering met Ithete voor 13 Junie gevra.Sinomine beplan om die smelter intussen met nuwe tegnologieë op te gradeer om die kommersiële produksie van verskeie metale en minerale moontlik te maak. Volgens die verklaring sluit laasgenoemde die herwinning van verskeie tipe metaal op Tsumeb, die produksie van alkaliese metaalsout, sowel as die verbranding van swael in. Met verwysing na die herwinning van verskillende metale het Sinomine reeds 'n omgewingsklaring gekry. Die eerste van drie fases bouwerk op die aanleg sal na verwagting nog in die vierde kwartaal van vanjaar van stapel gestuur word. Lau verwys ook in die verklaring na die identifisering van waardevolle kritieke minerale op die terrein van die smelter. Kyk hier ‘n kort video wat die smelter van nader uitbeeld: https://q.my.na/LOP2

Tsumeb-smelter (vir eers) gesluit

Kommentaar

Republikein 2025-11-03

Meld asseblief aan om kommentaar te lewer

Tsumeb-smelter (vir eers) gesluit

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.