Stormloop na groen waterstof tel spoed op

Die eerste ministers van Denemarke en Nederland, Mette Frederiksen en Mark Rutte, se eendagbesoek Maandag het verskeie ooreenkomste vir die ontwikkeling van ’n plaaslike groenwaterstofbedryf opgelewer. Die leiers het afvaardigings van sakelui uit dié Europese lande na Namibië vergesel.Tydens ’n sakeforum – wat deur die Namibiese Raad vir die Bevordering van Beleggings en Ontwikkeling (NIPDB) by die Hilton Hotel in die hoofstad gereël is – is van die ooreenkomste bekend gemaak.’n Ooreenkoms is onder meer aangekondig vir die befondsing van die SDG Namibia One Fonds – wat deur Joost Oosthuizen, Invest International se uitvoerende hoof, Andrew Johnstone, die uitvoerende hoof van Climate Fund Managers en Benedict Libanda, die uitvoerende hoof van die Environmental Investment Fund of Namibia, onderteken is.Verder is ’n ooreenkoms vir die samewerking om sonkragopleiding aan minderbevoorregte jeug te bied, deur Alex Nelis, die uitvoerende hoof van TerraWatt BV, en Olivia Namkomba van Young Africa Namibia aangekondig. Daarvolgens sal TerraWatt een student per megawatt wat die Nederlandse maatskappy in Namibië installeer, se studies befonds. Terrawatt ontwikkel nou sy eerste 50 megawatt-aanleg in Namibië.Impact Hydrogen en Kaoko Green Energy het ’n Memorandum van Verstandhouding (MoU) onderteken vir Hycooker in Namibië. Hycooker laat toe dat voedsel skoon en veilig gekook kan word, met die gebruik van waterstof. Die MoU is deur Impact se uitvoerende hoof, Nienke Homan, en Gerson Nasau van Kaoko onderteken. In terme van navorsing en ontwikkeling het dr. Anician Peters, hoof van die Nasionale Raad vir Navorsing, Wetenskap en Tegnologie (NCRST) ’n ooreenkoms met dr. Tjark Tjin-A-Tsoi van TNO onderteken. Dit om saam met Nederlandse wetenskaplike navorsers te werk. Peters het ook ’n brief van voorneme namens NCRST met Ulco Vermeulen, die direkteur vir sakeontwikkeling van Gasunie, onderteken. Gasunie is ’n energienetwerk-operateur in Nederland en Duitsland wat sy kundighede met Namibië sal deel. NamWater, Namport, Telecom Namibia en die Universiteit van Namibië en Nust sal almal uit hierdie brief van voorneme baat, het die kommissaris vir groen waterstof, James Mnyupe, by die geleentheid gesê.Verder is ooreengekom om die Suidelike Korridor-ontwikkelingsinisiatief te bevorder, met samewerking vanaf NamPort, NamPower, Invest International, Gasunie, die hawe van Rotterdam en die voorkeurbieër Hyphen, onder leiding van Mnyupe se implementeringsowerheid. Mnyupe het dit ’n strategiese vennootskap genoem, wat die hele waardeketting vanaf produksie, vervoer, berging en tot die uiteindelike verspreiding van waterstofmolekules in Europa dek.Rutte het gesê Nederland wil die eerste Europese land wees om grootmaat-groenwaterstof teen 2025 deur die hawe van Rotterdam te kan invoer. Hy sê sy regering is gereed om Namibië te help om vinnig voor te berei vir ’n toekoms wat reeds aan die land se deur klop. Op haar beurt het Frederiksen die belang van samewerking om klimaatsverandering te takel, beklemtoon, en gesê Namibië is een van die lande in die wêreld waar die impak daarvan die ergste gevoel word. As die volgende president van die Europese Unie wil sy ook Europa se vennootskap met Afrika, en die Afrika-unie versterk, waarmee Namibië se hulp noodsaaklik is, sê sy. Volgens haar deel almal in die stryd tot die “groen oorgang” en sy sê: “Hierdie gaan oor die bou van ’n beter toekoms vir ons kinders.” – augetto@republikein.com.na

Stormloop na groen waterstof tel spoed op

Kommentaar

Republikein 2025-11-04

Meld asseblief aan om kommentaar te lewer

Stormloop na groen waterstof tel spoed op

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.