Openbare insette genooi vir Venus-ontwikkeling

Olie van die Venus-olievelde langs die kus van Lüderitz sal nooit op Namibiese bodem beland indien die huidige planne vir die ontwikkeling van die olie-ontdekking en die ontginning van die olie goedgekeur en van stapel gestuur word nie.Besware en insette oor die plan wat TotalEnergies EP Namibia B.V. nou bevorder, sal van 3 November tot 21 November vanjaar ingedien kan word.Dit is in die lig van die vereiste omgewings- en maatskaplike impakstudie (ESIA) wat voortduur. Die impakstudieproses word deur SLR Environmental Consulting (Namibia) namens TotalEnergies en sy vennote behartig.Luidens ’n verklaring wat SLR Maandag uitgereik het, is TotalEnergies se vennote in die gesamentlike onderneming (JV) in die Venus-ontwikkelingsprojek tans Impact Oil & Gas, Namcor en QatarEnergy.Die verklaring sit die agtergrond van die beplande ontwikkeling uiteen en brei uit dat olie in 2022 in Blok 2913B langs die kus van Namibië ontdek is en die ontdekking, genaamd Venus, daarna deur die vennote geëvalueer is.Vroeg verlede jaar is Namibië se petroleumkommissaris, Maggy Shino, aangehaal waar sy gesê het die Venus-ontdekking kan tot ongeveer 2 miljard vate herwinbare olie bevat.“Die gesamentlike onderneming wil nou beweeg na die ontwikkeling van die Venus-veld. Hierdie veld is in die diepsee geleë, ongeveer 300 km vanaf Oranjemund, 320 km vanaf Lüderitz en 700 km vanaf Walvisbaai in waterdieptes van ongeveer 3 000 m,” volgens die jongste verklaring.Die ontwikkelaars beoog om tot 40 boorgate in die seebodem te boor, olie uit dié boorgate te onttrek en vloeistowwe te skei op ’n drywende produksie-, bergings- en aflaaivaartuig (FPSO) wat in die Venus-veld vasgemeer sal word, en om die gas terug in sommige van die boorgate te pomp.Sedert 1969 is minder as 30 olieboorgate tot op hede in Namibiese waters geboor.Die olie sal dan van die FPSO na tenkskepe oorgepomp word, om direk na die kopers vervoer te word, lui die verklaring.“Geen produksiegeriewe aan land vorm deel van die projek nie,” beklemtoon die verklaring uitdruklik.“Die boor van die diepsee-boorgate en die installering van die diepsee-produksiegeriewe sal ongeveer vyf jaar neem, waarna produksie sal begin en vir ongeveer 20 jaar sal voortduur,” lui die verklaring verder.Die verklaring brei ook uit dat voorraadbote bedrywighede tydens die produksiefase sal ondersteun, wat tussen ’n landing en die FPSO sal beweeg.Voordat die voorgestelde ontwikkeling kan voortgaan, moet ’n omgewingsklaringsertifikaat (ECC) van die ministerie van die omgewing, bosbou en toerisme verkry word, en deel van hierdie proses behels ’n omgewings- en maatskaplike impakstudie (ESIA) wat uitgevoer moet word.Gevolglik, en in ooreenstemming met Namibiese omgewingsimpakstudieregulasies, moet openbare vergaderings gehou word en insette formeel ingesamel word.Belangstellendes word uitgenooi om openbare geleenthede tussen 3 November en 21 November by te woon. Keetmanshoop (3 November) kom eerste aan die beurt, gevolg deur Bethanie (4 Nov.), Lüderitz (5, 6, 7, 8 Nov.), Oranjemund (10 Nov.), Windhoek (13 en 14 Nov.), Hentiesbaai en Swakopmund (17 Nov.) en Walvisbaai (19 en 20 Nov.) of sluit aan by aanlyn vergaderings op 5, 13, 14 en 21 November.Besoek q.my.na/4JAW om aanlyn deel te neem, of om as ’n belangstellende of geraakte party te registreer, volg hierdie skakel: q.my.na/GJR8.– augetto@nmh-hub.com.na

Openbare insette genooi vir Venus-ontwikkeling

Kommentaar

Republikein 2026-03-26

Meld asseblief aan om kommentaar te lewer

Openbare insette genooi vir Venus-ontwikkeling

Kommentaar

Republikein 2026-03-26

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.