Omgewingsklaring vir Kudu

SLR Environmental Consulting het namens hul kliënt, BW Kudu, bevestig dat die ministerie van die omgewing, bosbou en toerisme op 25 Julie ’n omgewingsklaringsertifikaat uitgereik het om boorwerk op die Kudu-gasvelde langs die suidkus van Namibië toe te laat.

Chevron het die gasveld aanvanklik in 1974 ontdek en tussen 1987 en 1988 het Swakor verdere eksplorasiewerk uitgevoer met boorwerk by Kudu 9A-2 en Kudu 9A-3, waarvan laasgenoemde gas opgelewer het. In die vroeë 2000’s het Shell aan die projek onttrek nadat vier verdere skagte geboor is.

Namibië hoop al jare om dié gasbron te ontgin, wat moontlik geskatte reserwes van 1,3 triljoen kubieke voet gas bevat. BW Kudu is ’n filiaal van die reuse-olie- en gasontwikkelaar BW Energy van Noorweë en besit 95% van die Kudu-projek, met die Nasionale Petroleumkorporasie van Namibië (Namcor) wat die oorblywende 5% besit. BW Kudu het onlangs aangekondig dat die olieplatform, Deepsea Mira, die boorwerk sal uitvoer.

– [email protected]