‘Olie groener as groen’

Die Namibië Internasionale Energieberaad is gister deur sowat 800 afgevaardigdes van oraloor die wêreld bygewoon, wat onder meer topleierskap van groot internasionale oliemaatskappye, die Organisasie van Petroleumuitvoerlande (Opul), die Afrika Kamer van Energie en die ministerie van myne en energie ingesluit het.

Die energieminister, Tom Alweendo, het in sy toespraak by die amptelike opening die bedryf aangemoedig om plaaslike inhoud en deelname aan die oliebedryf te bevorder al is die nasionale beleid vir plaaslike inhoud nog nie van krag nie.

“Vir diegene wat kommersiële ontdekkings maak, wil ons hê die ontwikkeling van die ontdekkings moet bespoedig word,” het hy gesê.

“Ons het die hulpbronne uit die grond nodig vir die olie- en gasbedryf om te floreer.”

Hy voer verder aan dat oliemaatskappye spoedig hul jaarlikse kapasiteitsbou en Namibiese inhoudsplanne aan die ministerie moet voorlê.

Namcor, die Namibiese staatsbeheerde oliemaatskappy, se waarnemende besturende direkteur, Ebson Uanguta, beskryf die jongste ontdekking van moontlik meer as 10 miljard vate olie in die Mopane-boorgat in die diepsee-eksplorasiegebied PEL83 as beduidend.

Galp is die meerderheidsaandeelhouer (80%) en in beheer van die projek, met Namcor, en Knowledge Katti se Custos Energy, wat elkeen ’n 10%-belang besit.

Namibië se petroleumkommissaris, Maggy Shino, het by dieselfde geleentheid gesê nog boorwerk word voor die einde van die jaar in die nabygeleë PEL90-gebied verwag, waar Chevron ’n soortgelyke vennootskap met Namcor en nog ’n Katti-maatskappy, Trago Energy, het.

Channa Kurukulasuriya, Chevron se bestuurder in Namibië, sê die land se toekoms is blink.

Vanjaar sal Rhino Resources ook na verwagting in PEL85 begin boor, volgens Shino, terwyl dié private maatskappy gister ’n ooreenkoms met Halliburton aangekondig het om ’n reeks diepsee-boorgate te boor.

Meer eksplorasieboorwerk word volgende jaar in PEL86, 89 en 90 verwag, voeg sy by. Shino sê dat Galp volgende jaar nog vier boorgate gaan boor om die opbrengs van die Mopani-stelsel te bepaal.

Shell het ook sowat ’n week gelede aangekondig dat hy olie vir die sesde keer ontdek het, dié keer in die Enigma-boorgat sowat 15 km suidoos van sy vorige Jonker-ontdekking, en ook in die Oranjekom waar die 2022-ontdekking in Graff-1 gemaak is.

Die grootste van die onlangse ontdekkings bly Total Energies se Venus, wat Shino as ’n reus beskryf.

Volgens haar is Total tans voor in die produksiewedloop, met die verwagting dat dié Franse maatskappy teen 2029 of 2030 olieproduksie aan Namibië kan lewer.

Shino noem ook vooruitsigte vir die ontwikkeling van die Kudu-gasbron en verdere eksplorasie in Namibië se binneland en nader aan die kus.

Sy sê Lüderitz is geïdentifiseer as die spilpunt vir die oliebedryf in Namibië en ontwikkeling by Elizabeth-baai sal toegewy word om die bedryf te ondersteun.

Shino sê die regering se doelwit is dat elke vat olie wat uit die grond kom, moet aandui dat dit Namibies is.

Plaaslike deelname is ’n moet, maar die ontwerp van produksievelde sal ook op ’n gekoördineerde wyse gedoen word en van “groen” tegnologie gebruik maak.

“Ons sal die groenste vate olie vervaardig wat vervaardig kan word. Namibië se olie sal groener as groen wees,” sê die petroleumkommissaris.

Die beraad is by Droombos buite Windhoek aangebied.

– [email protected]