NamPower verkry mobiele substasies

Ná jare van beplanning is NamPower naby aan die verkryging van twee mobiele substasies wat die sekerheid van kragtoevoer gedurende enige ondrbreking in transmissie by substasies oraloor die land sal verbeter. Die mobiele substasies sal ontplooi kan word om kragtoevoer te herstel terwyl herstelwerk afgehandel word. Die mobiele substasies genaamd Rhino (92 ton) en Buffalo (82 ton) kos N$26 miljoen elk, of N$52 miljoen gesamentlik.Teen 20 MVA sal Rhino veelvuldige spanningsverhoudings van 132/66 kV tot 33/11 kV kan voorsien, terwyl Buffalo van 132/66 kV tot 22/11 kV kan hanteer. Volgens NamPower se woordvoerder, me. Irene !Hoaes, is die projek reeds in 2016 van stapel gestuur. Bykomende voordele van die twee mobiele aanlegte sluit in hul gebruik om alternatiewe tydelike kragtoevoer te fasiliteer terwyl nuwe installerings, onderhoud of opgradering gedoen moet word. “Dis opmerklik dat geen standaardontwerpe vir hierdie spesifieke mobiele substasies beskikbaar is nie. Die ontwerpe van Rhino en Buffalo was dus ingewikkeld met hul gewig en grootte as van die beperkende faktore,” brei sy ui. Beide Rhino en Buffalo sal na verwagting teen die middel van die jaar afgelewer word en sal in Windhoek gebaseer wees. Die massiewe toerusting word tans in Suid-Afrika by P&L Machine Moving & Rigging naby Pretoria vervaardig. Verskeie vervaardigers was betrokke om die onderdele aanmekaar te sit, insluitend SBG-Smit Power Malta in Pretoria en Kaapstad waar die transformators vervaardig is. ABB in Swede en Switserland het die stroomafleiers gebou; ABB in Italië is waar die gemengde-tegnologie HV-skakeltuig aanmekaargesit is; ABB in Duitsland is waar die gas-geïsoleerde MV-skakeltoestel gebou is en by Italië se Aristoncavi is die geïsoleerde MV-kabels vervaardig.Verder was die drie-as en vier-as sleepwaens deur SA Truck Bodies in Bloemfontein vervaardig en die stelsel vir beskerming, outomatisering en beheer is deur ABB Internasionaal en in Suid-Afrika gebou. Albei substasies sal hierheen vervoer word met Volvo FH520-voertuie wat reeds deel van NamPower se vloot is.Mnr. Kahenge Haulofu, die nasionale kragvoorsiener se uitvoerende direkteur, sê: “Hierdie mobiele substasies is strategiese transmissie-bates, eerstens gemik op die versagting van die risiko van verlengde onderbreking in kragtoevoer aan die kliënt. “Die verkryging van die mobiele substasies laat NamPower toe om sy pligte in die versekering van toevoer tot die nasie beter vol te hou.”Grootmaatkliënte sal ook baat deur vinniger tydelike herstel van kragtoevoer in die geval van onderbreking, volgens NamPower.– augetto@republikein.com.na

NamPower verkry mobiele substasies

Kommentaar

Republikein 2026-02-03

Meld asseblief aan om kommentaar te lewer

NamPower verkry mobiele substasies

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.