Meer eksplorasie, meer myne

Mynbou lewer voortdurend ’n beduidende bydrae tot die ekonomie van die land.Só het die adjunkminister van nywerheidsontwikkeling, myne en energie, Gaudentia Kröhne, Woensdag tydens die Namibiese Kamer van Mynwese se 45ste jaarvergadering in Windhoek gesê.Sy het ook gesê werkskepping is hoog op die regering se agenda vir die sektor, en kan slegs bereik word deur meer mineraalneerslae op te spoor en meer myne te open. “Die ministerie sal hard werk om nie die toekenning van eksplorasie- en mynboulisensies te vertraag nie, of besigheid in die land te belemmer nie,” het sy belowe.Volgens die kamer het mynbou verlede jaar sowat 13,6% meer werksgeleenthede (20 654 poste) geskep, waarvan sowat 9 000 direk en permanent was. Sowat 97% van mynwerkers in die land is Namibiërs.‘BESTEE OP EKSPLORASIE’In sy toespraak het die uittredende president van die Kamer van Mynwese, Zebra Kasete, ook lede aangemoedig om op eksplorasie te bestee.Kasete het klem daarop gelê dat die bedryf vir die eerste keer in 2024 sowat N$1,485 miljard aan eksplorasie bestee het, ’n beduidende bedrag volgens hom, en broodnodig om toekomstige mynbouprojekte te identifiseer.Verder het die bedryf verlede jaar sowat N$5 miljard aan kapitaalprojekte bestee, insluitend die bou van nuwe myne, die herlewing van myne onder sorg en onderhoud, en die instandhouding van myne wat reeds bestaan, sê hy.Ondanks ’n moeilike boekjaar waarin die vraag na diamante uit China en Amerika aansienlik gedaal het, het Namibiese goud goed gevaar met internasionale pryse wat die hoogte ingeskiet het, sê hy.Goudpryse het verlede jaar met 31% gestyg en styg steeds, daarom is dit nodig om goudmynprojekte landswyd te bespoedig, sê hy.Goudproduksie het verlede jaar met 2,7% gegroei. Groei in uraanpryse, teen US$101 per pond in Februarie 2025 en die hoogste sedert 2008, het die opbrengste vir Namibiese myne verlede jaar verbeter, hoewel pryse nog nie die punt bereik het waar sommige nuwe myne gereed is om ontwikkel te word nie, voeg hy by.Die pryse van koper (8%), sink (5%) en tin (18%) het ook verbeter, hoewel die prys van lood met 7% gedaal het.Mynbou het in 2024 sowat 13,3% tot die land se bruto binnelandse produk (BBP) bygedra, “’n daling van 1,2% meestal as gevolg van diamante,” sê Kasete.Mynbou het verlede jaar N$5,6 miljard in die staatskas gepomp, insluitend effens minder belastingbydraes van sowat N$3 miljard, en meer tantième teen N$2,6 miljard, brei hy uit.BELEIDEHoogtepunte vir die plaaslike mynbousektor verlede jaar sluit die hervatting van produksie by die Langer Heinrich-uraanmyn en die opknapping van die Tschudi-koperaanleg deur Consolidated Copper in.Kasete het ’n beroep op die regering gedoen om saam met die bedryf te werk om die mynbedryf te laat groei, deur die regte beleide te bevorder en die goedkeuringsproses te versnel.“Ons het sekerheid nodig wat beleide betref. Ons hoop sekere langverwagte hervormings kan vanjaar afgehandel word,” sê hy.Die mynbedryf soek klaring oor die regering se planne vir gratis eienaarskap, die voorgestelde mineraalooreenkomste, bemagtigingswetsontwerpe en die bevordering van beleggingswetsontwerp, en gesondheids- en veiligheidsregulasies.“Ons het water nodig om die myne (in Erongo) te ontwikkel,” het hy ook genoem, met ’n huidige tekort van tot 500 m³ per uur, langs die kus, wat dringend aangepak moet word.HOUERS VAN MINERAALREGTEOp haar beurt het Kröhne die regering se kommer uitgespreek oor houers van mineraalregte en lisensies wat nie by goedgekeurde eksplorasieprogramme hou nie, of te lank neem om te begin, wat potensiële ontdekkings vertraag.Mynlisensies wat lank gelede toegeken is, maar waar geen ontwikkeling plaasvind nie, is ook ’n bekommernis. Die ministerie sal binnekort hierdie lisensiehouers nader, sê sy.Lisensie-aansoeke sal ook binnekort aanlyn gedoen word, voeg sy by.Kasete het die verlies van ’n lewe gedurende 2024 en die aantekening van nog ongelukke verlede jaar betreur. Veiligheid sal vanjaar hernude fokus geniet, sê hy.Die groot geleentheid vir meer betrokkenheid by mynbou is in plaaslike verkryging, sê Kasete en merk op dat ’n databasis van mynbou-insette voltooi en gereed is vir gebruik.Nog goeie nuus is dat vanjaar se mynbou-ekspo na drie dae verleng word, en beoog ’n verdere verbetering op verlede jaar se 196 uitstallers en 17 831 besoekers. – augetto@nmh-hub.com.na

Meer eksplorasie, meer myne

Kommentaar

Republikein 2025-04-30

Meld asseblief aan om kommentaar te lewer

Meer eksplorasie, meer myne

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie