Litiumerts-uitvoere se dae getel

Die omstrede Chinese litiummynbouer, Xinfeng Investments, kan nog tot 15 Desember, deur sy vennootskap met Long Fire Investments, 4 000 ton litiumerts uitvoer. Dit nadat die vragskip Da Liang op 15 November in die Walvisbaaise hawe aangekom het en volgens Namport se werkplan 26 000 ton litiumerts opgelaai het. Die vragskip het die hawe weer op 22 November verlaat. Volgens die ministerie van myne en energie se waarnemende uitvoerende direkteur, Bryan Eiseb, is die ministerie nie bewus van ’n ander skip wat die oorblywende erts moet laai nie.Xinfeng mag self nie enige erts uitvoer nie, veral sedert die kabinet vroeër vanjaar ’n verbod op die uitvoer van onverwerkte kritieke minerale geplaas het. ’n Uitvoerpermit van 30 000 ton wat egter voor dié verbod in werking getree het, is aan Long Fire Investments toegeken. Dié permit verval op 15 Desember.Xinfeng se litiummyn by Omaruru bly ook ’n kopseer vir die maatskappy aangesien die minister van myne en energie, Tom Alweendo, poog om die betrokke mynlisensie te laat herroep.In samewerking met Long Fire bou Xinfeng nog ’n oopgroefmyn op kleims 73407 tot 73418 buite Uis waar die litiumerts ontgin word.Eiseb hou vol dat litium deel vorm van die kritieke minerale waarop die kabinet die verbod op onverwerkte ertsuitvoere geplaas het en dat die ministerie die kabinet se besluit streng sal afdwing.Intussen het Andrada, nog ’n litiummynbouer op Uis, vandeesweek aangekondig dat 10 ton litiumkonsentraat – volgens spesifikasies – suksesvol by sy toetsaanleg vervaardig is. In Andrada se mediaverklaring wat Maandag uitgereik is, sê die onderneming die konsentraat is gereed om verkoop te word en hy verwag dat produksie teen die eerste kwartaal van 2024 tot 150 ton per maand verhoog kan word.Verder sê Andrada dat onderhandeling vir litiumverkope aan ’n glas- en keramiekvervaardiger goed vorder, en dat metallurgiese toetse vir die vervaardiging van batterygraad-litiumhidroksied voortduur. Toetse duur ook voort om die produksie van die Uis-myn te verbeter terwyl Spodumene Hill en Lithium Ridge ook ondersoek word. “Boorveldtogte vir litium-eksplorasie word vir alle mynlisensiegebiede in 2024 beplan,” volgens Andrada.“Ons glo dat ons pogings deur die jaar die potensiaal het om Andrada aan die voorpunt van litiumontwikkeling in Afrika te plaas. “Die ontdekking van bykomende litium, binne die Lithium Ridge- en Spodumene Hill-lisensiegebiede, beklemtoon ook die moontlikheid dat Namibië se Erongostreek ’n sleutelrolspeler in die globale litiumlandskap kan word, met die potensiaal om ’n groep beduidende myne te huisves. “Die vroeë resultate van die litiumverwerking-toetsaanleg, wat onlangs in gebruik geneem is, het onwrikbare optimisme geskep. Ons is ook bly oor die voortgesette onderhandelinge met litiumkopers, wat Andrada se betrokkenheid in alle litiummarkte stroomaf in die waardeketting teiken,” sê Anthony Viljoen, Andrada se uitvoerende hoof. – augetto@republikein.com.na

Litiumerts-uitvoere se dae getel

Kommentaar

Republikein 2025-06-16

Meld asseblief aan om kommentaar te lewer

Litiumerts-uitvoere se dae getel

Kommentaar

Republikein 2025-06-16

Meld asseblief aan om kommentaar te lewer

MELD AAN

Advertensie