Kombat-werkers nader arbeidskommissie

Die afgedankte werknemers van die Kombat-kopermyn het die eienaars, Trigon Metals, na die arbeidskommissie geneem ná die myn se oorstroming en die daaropvolgende staking van bedrywighede.Die massa-werksverliese by die kopermyn het in ’n amptelike arbeidsdispuut ontaard nadat die Mynwerkersvakbond van Namibië (MUN) die saak dringend onder die aandag van die arbeidskommissie gebring het.Die vakbondleier Fillepus Ampweya het Sondag bevestig meer as 500 mynwerkers het die vakbond die mandaat gegee om die afleggings te bevraagteken en om spesifiek die prosedures wat gevolg is uit te daag.“Dis duidelik dat die bestuur die korrekte prosedures blatant geïgnoreer het. Die skielike en geheimsinnige aard van hierdie afleggings het ons genoop om hierdie dispuut op ’n dringende basis te verwys,” het Ampweya Sondag aan Network Media Hub (NMH) gesê.Hy het bevestig dat altesaam 533 Kombat-mynwerkers hul werk verloor het.Trigon Metals, die Kanadese genoteerde maatskappy wat die Kombat-kopermyn besit, het op Vrydag 31 Januarie ’n verklaring uitgereik in verband met die opskorting van alle mynbedrywighede op die perseel.Dit het gekom nadat werknemers die vorige Donderdag afgelê is en die myn se hekke vroeg Vrydag gesluit is. Die maatskappy het sy oorsese aandeelhouers ingelig oor ’n “proaktiewe operasionale aanpassing”, met verwysing na “onbeplande instandhoudingsvereistes” vir sy wateronttrekkingstelsels.Trigon het op 16 Januarie 2025 aangekondig dat twee van sy hoof-wateronttrekkingspompe gebreek het, wat gevolglik gelei het tot die opskorting van ondergrondse mynbedrywighede weens verwagte oorstromingsrisiko’s.“Die dompelpompe is van kritieke belang vir bedrywighede by Kombat, en omdat hulle onverwags gebreek het, het dit geen onmiddellike oplossing vir ’n volledige stelselherstel gelaat nie.“Albei pompe is uit die skagte verwyder en na ’n derdeparty-ingenieursfirma gestuur vir onafhanklike bevestiging van die hoofoorsake waarom die pompe gebreek het.“Ongelukkig, as gevolg van watervlakke wat teruggekeer het na hul normale vlakke van 60 meter by Skag 1 en 120 meter by Skag 3, sal mynbedrywighede opgeskort word tot wateronttrekking hervat het. “Die maatskappy verwag dat die onttrekking van water weer in die derde kwartaal (Q3) van 2025 sal begin, mits die pompe herstel word en die risiko van herhaling suksesvol verminder is,” het Trigon gesê. AFLEGGINGS“As gevolg van hierdie operasionele terugslag, kondig die maatskappy ook die onmiddellike aflegging van die meerderheid van sy werksmag op die perseel aan,” lui Trigon se jongste verklaring. “Terwyl hierdie besluit onder die huidige omstandighede nodig is, word dit met groot spyt geneem.”Trigon sê hy bly daartoe verbind om geraakte werknemers te ondersteun.Dit sluit ruim skeidingspakkette in, asook om uitgebreide gesondheidsorgvoordele en toegewyde bystand vir werkplasing in vennootskap met plaaslike organisasies aan te bied.“Trigon bly optimisties oor die heraanstelling en herintegrasie van sy arbeidsmag sodra bedrywighede hervat word.”VAKBOND SE REAKSIEAmpweya sê egter die gebrek aan voldoende kennisgewing vir die afleggings het die werknemers die geleentheid ontneem om voor te berei. “Nie net is werknemers nie ingelig oor die behoefte aan mediese ondersoeke nie, maar die versuim om hul gesondheidstatus te bepaal ná die beëindiging [van hul werkstermyn] hou ernstige gevolge vir hul welstand in,” het hy bygevoeg.REAKSIE VAN TRIGON EN KATTITrigon se uitvoerende hoof, Jed Richardson, het sy dankbaarheid teenoor werknemers en kontrakteurs in die verklaring uitgespreek, “wie se toewyding instrumenteel in ons vordering tot dusver was”.Plaaslike aandeelhouer en sakeman Knowledge Katti word ook aangehaal: “Ons erken die geldige bekommernisse van die Kombat-gemeenskap en alle Trigon Mining-werknemers gedurende hierdie uitdagende tydperk. “Alhoewel hierdie tydelike onderbreking ’n terugslag is, is dit ook ’n geleentheid om ons grondslag vir die toekoms te versterk. “Saam sal ons sterker terugkom,” het hy aangevoer. – augetto@nmh-hub.com.na

Kombat-werkers nader arbeidskommissie

Kommentaar

Republikein 2026-05-04

Meld asseblief aan om kommentaar te lewer

Kombat-werkers nader arbeidskommissie

Kommentaar

Republikein 2026-05-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.