Hyphen gaan miljoene bestee aan grondregte

Hyphen Hydrogen Energy gaan jaarliks meer as N$1,2 miljard aan sy groenwaterstofprojek in Namibië bestee.Dié bedrag wat Dinsdag tydens ’n inligtingsdag op Rundu gedeel is, het die beduidende finansiële verbintenisse beklemtoon en ook vrae laat ontstaan oor die langtermyn-ekonomiese en omgewingsimplikasies van die inisiatief.Die senior ontwikkelingsbestuurder Johannes Shipepe het verduidelik dat Hyphen die Namibiese regering jaarliks sowat N$120 miljoen vir grondregte sal betaal gedurende die huidige fase binne ’n nasionale park. Met die konsessie se lewensduur van 40 jaar, kan hierdie betalings tot byna N$8,4 miljard styg, uitgesluit ander bedryfskoste en omgewingsfooie.“Ons huidige huurbetalings staan op N$120 miljoen jaarliks,” het hy gesê. “Soos ons in konstruksie beweeg, sal die bedrag tot N$200 miljoen per jaar styg en dan weer wanneer ons operasioneel is met N$240 miljoen jaarliks en met ’n jaarlikse verhoging van 2%,” het Shipepe verduidelik.Hy het beklemtoon dat hierdie syfers Hyphen se finansiële verpligtinge teenoor die regering verteenwoordig en deel is van Namibië se breër strategie om sy groenwaterstofsektor te ontwikkel en nuwe nywerhede te laat groei.Benewens die betalings vir grondgebruik, sal die regering ook ’n tantièmefooi van 2% ontvang uit inkomste van amoniakverkope wat uit groenwaterstofproduksie verkry word. Die regering trek ook voordeel uit omgewingsfooie en ander heffings wat met grondgebruik verband hou. Die geprojekteerde syfers het egter kommer gewek oor of Namibië se natuurlike hulpbronne en grond optimaal gebruik word, veral in die lig daarvan dat die projek in ’n nasionale park se sensitiewe omgewing geleë is. Shipepe het verduidelik dat Namibië se strategie vir groen waterstof verder as Hyphen strek en ander loodsprojekte oraloor die land insluit. Die projekte sluit in Taurus, wat fokus op die produksie van kunsmis met die gebruik van groen waterstof; Trenergy, wat daarop gemik is om myne se vloot voertuie met groen waterstof eerder as diesel te hervul; asook Enron Origin, wat die vervaardiging van groen yster ondersoek. Hoewel dié projekte die potensiaal vir die ontwikkeling van plaaslike nywerhede uitgelig het, bly Namibië se huidige vraag na groen waterstof beperk. Volgens Shipepe maak dit die grootskaalse plaaslike verbruik in die nabye toekoms onwaarskynlik. ’n Raadslid vir die Rundu- stedelike kiesafdeling, Vicky Kauma, het tydens dieselfde geleentheid en namens Kavango-Oos se goewerneur, Hamunyera Hambyuka, die projek se voordele vir die streek beklemtoon. Volgens Hambyuka sal die positiewe bydraes werkskepping, vaardigheidsontwikkeling, plaaslike verkrygingsgeleenthede sowel as die bevordering van sosioëkonomiese groei in die streek insluit.– republikein@republikein.com.na

Hyphen gaan miljoene bestee aan grondregte

Kommentaar

Republikein 2025-09-16

Meld asseblief aan om kommentaar te lewer

Hyphen gaan miljoene bestee aan grondregte

Kommentaar

Republikein 2025-09-16

Meld asseblief aan om kommentaar te lewer

MELD AAN

Advertensie