Hoofstad delg kragskuld

Die Windhoekse munisipaliteit (CoW) het Vrydag aangekondig NamPower se plan om wanbetalers se kragtoevoer af te sny, sal nie woongebiede in- en aan die buitewyke van die hoofstad raak nie. Groot Aub en Brakwater is uit die knyp nadat die stadsraad maatreëls getref het om die skuld te delg. Dit volgens Harold Akwenye, die CoW se hoofwoordvoerder. Volgens Lydia Amutenya, ook ’n woordvoerder van die munisipaliteit, is uitstaande skuld van N$500 000 reeds teen Vrydag afbetaal.NamPower het vroeg vandeesmaand aangekondig dat kliënte die nasionale kragverskaffer N$1,5 miljard skuld, waarvan N$842 miljoen agterstallig is. Verlede week het NamPower se uitvoerende hoof, Simson Haulofu, uitdruklik gesê alle betrokke instansies weet van die stappe wat beplan word om die skuld in te vorder. Vanaf Maandag 5 Junie sal verskeie munisipaliteite se kragtoevoer onderbreek word. Dieselfde stappe geld vir Nored, wat dorpe in die noorde van die land van krag voorsien, Cenored in Okahandja, asook die ||Karas-streekraad. As plaaslike owerhede soos Rehoboth, Mariental, Gobabis en Aranos nie teen 31 Mei betaal nie, sal die krag vir vier ure - vanaf 11:00 tot 15:00 - vanaf die eerste Maandag in Junie af wees. Fase een van die maatreëls om skuld in te vorder is slegs op een weeksdag van toepassing, maar NamPower het reeds nege fases uiteengesit. In fase nege sal inwoners van dorpies soos Karasburg, Maltahöhe, Gibeon, Bethanie en Tses, Koës, Leonardville en Berseba vir agt ure per dag sonder elektrisiteit moet klaarkom. Ander plekke wat ook op NamPower se lys verskyn sluit in Lüderitz, Kalkrand, Stampriet, Gochas, Witvlei en Aroab.Haulofu sê as NamPower kragtoevoer afsny sal dit by sy substasies wees wat betrokke plaaslike owerhede van elektrisiteit voorsien. Dus sal inwoners wat van koopkrag gebruik maak, ook geraak word, saam met hospitale en enige ander instansies in die omtrek. Hy het simpatie uitgespreek teenoor inwoners wat wel hul kragrekeninge betaal en het gesê hulle moet druk op plaaslike owerhede plaas om te betaal wat hulle aan NamPower verskuldig is. Hy het gesê NamPower weet byvoorbeeld dat Rehoboth se inwoners van koopkrag gebruik maak, maar “wat aan ons verskuldig is, word nie aan ons oorbetaal nie”. By dieselfde geleentheid het NamPower se hoof van finansies, Michael Gotore, gesê Nored is verantwoordelik vir 23% van die totale skuldbedrag, met Rehoboth wat 10% skuld, Windhoek (die grootste kliënt) 9%, en Erongo RED wat sowat 5,6% van die totale bedrag skuld. GEEN WATER Intussen is Windhoek se inwoners ook gewaarsku dat die hoofstad môre nie water sal hê nie. Vanaf agtuur die oggend tot agtuur die aand sal watertoevoer in die hoofstad afgesny word omdat NamWater ’n lekkasie in die waterpyp vanaf die Von Bachdam na Windhoek moet herstel. NamWater het Vrydag die geskeduleerde onderbreking van 12 ure aangekondig. Die nasionale waterverskaffer moedig inwoners aan om vroegtydig die nodige reëlings te tref om deur die onderbreking te kom, en belowe om inwoners op hoogte te hou van vordering met die herstelwerk.augetto@republikein.com.na

Hoofstad delg kragskuld

Kommentaar

Republikein 2025-05-01

Meld asseblief aan om kommentaar te lewer

Hoofstad delg kragskuld

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie