Handel dryf in krag vergemaklik

Die gids vir toegang tot die Suider-Afrikaanse kragpoel (SAPP) en die gewysigde enkelkopermark is Maandag in die hoofstad bekend gestel.Die Elektrisiteitsbeheerraad (ECB) en NamPower in samewerking met die SAPP het ’n konferensie by die Mercure Hotel in Windhoek aangebied oor toegang tot die gesamentlike mark. Die konferensie het gister tot ’n einde geloop.Pinehas Mutota, die algemene bestuurder vir ekonomiese regulasie by die ECB, het Maandag namens die uitvoerende hoof, Robert Kahimise, ’n toespraak gelewer; asook Fritz Jacobs namens NamPower se uitvoerende direkteur, Simson Haulofu; en die uitvoerende direkteur, Bryan Eiseb, namens die minister van myne en energie, Tom Alweendo.Volgens Eiseb is die geleentheid ’n mylpaal vir Namibië se reis na ’n meer toeganklike energiemark – plaaslik en in die streek. Hy brei uit dat Namibië se gewysigde enkelkoperstelsel nou onafhanklike kragverskaffers en sekere kliënte toelaat om direk met mekaar handel te dryf vir ’n gedeelte van die kliënte se kragaanvraag. Dié kliënte sluit in streekkragverspreiders, plaaslike owerhede, myne en ander grootmaat-aankopers. Die stelsel laat ook onafhanklike kragverskaffers toe om spesifiek krag vir uitvoerdoeleindes op te wek.Kragverskaffers, reguleerders, finansierders, ontwikkelingsvennote en grootmaat-aankopers was teenwoordig.Get-Transform – ’n ontwikkelingsvennoot wat deur die Europese Unie gefinansier word – sal Namibië vir twee tot vyf jaar help met die ontwikkeling van sy kragmark en infrastruktuur.Volgens Eiseb is hulle almal belanghebbers in die nuwe Namibiese kragmark-landskap wat ook na die buiteland uitbrei, danksy die samewerking met die SAPP. Deur die SAPP se koördinasiesentrum dryf lande in Suider-Afrika met mekaar handel om oorskotkrag te koop en te verkoop. Wilson Masango, die hoofingenieur vir markte by die SAPP, sê die stelsel werk baie soos ’n aandelemark waar lande met mekaar met elektrisiteit handel dryf, in plaas van aandele.Die uitvoerende direkteur van die koördinasiesentrum, Stephen Dihwa, het uitgebrei oor die veranderende omgewing waarin die kragpoel werk. Teen 2030 wil die SAPP deelname in sy submarkte met 50% vermeerder, sê hy. Eiseb voeg by dat Namibië poog om universele toegang tot elektrisiteit vir alle Namibiërs teen 2040 te bied. Op die oomblik word krag aan 72% van stedelike inwoners en slegs 35% van landelike inwoners voorsien. Volgens die uitvoerende direkteur het 45% van alle Namibiërs nie toegang tot elektrisiteit nie.Eiseb glo dat die kragmark wat tans uitbrei, die handel in nasionale en streekwye krag ’n hupstoot sal gee. Met Namibië se voortdurende ontwikkeling van hernubare kragbronne beoog die regering om die invoer van elektrisiteit teen 2028 vanaf 70% (tans), tot 30% te verminder, sê hy. Daarvoor is beleggings in opwekking, opgedateerde transmissie en infrastruktuur vir verspreiding broodnodig, sê hy. Uitgebreide handel in krag kan hierdie doelwitte nader bring, volgens die uitvoerende direkteur. – augetto@republikein.com.na

Handel dryf in krag vergemaklik

Kommentaar

Republikein 2025-12-01

Meld asseblief aan om kommentaar te lewer

Handel dryf in krag vergemaklik

Kommentaar

Republikein 2025-12-01

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.