Groen waterstof: ‘Gebrek aan belangstelling’ rede vir skeptisisme

Ogone Tlhage - Namibië se groenwaterstofkommissaris, James Mnyupe, sê bewerings dat daar in die geheim oor Namibië se groenwaterstofprogram onderhandel word, is nie waar nie.

In dieselfde asem sê hy die gebrek aan belangstelling in die projek – wat nog in sy kinderskoene is – is die rede waarom baie Namibiërs skepties daaroor is.

Namibië het sy ambisieuse groenwaterstofprojek in Maart 2021, tesame met die tweede fase van die Harambee-welvaartsplan (HPP2), van stapel gestuur en Mnyupe het gesê ondanks vroeë pogings om beleggers vir die projek te kry, het Namibiërs in die uitkomste van die projek getwyfel.

Namibië se ambisies met betrekking tot die ontwikkeling van groen waterstof het wye skeptisisme ontlok – deels weens ’n vereiste dat die regering betaal vir ’n 24%-aandeel in die projek van US$10 miljard wat die Belgiese maatskappy Hyphen Hydrogen Energy voorgelê het, en deels weens kommer oor die regering se hantering van sy groenwaterstofprogram, wat in geheimhouding gehul is.

GEBREK AAN BELANGSTELLING

“As ek openhartig praat, toe ons die reis begin het en ons hierdie dinge in HPP begin verwoord het, dink ek daar was ’n redelike gebrek aan belangstelling van sommige van die lede van die Namibiese publiek. Ek dink hulle het gedink dit is te kompleks, hulle het nie gedink dit is lewensvatbaar nie, so die publiek het nie regtig tot so ’n mate betrokke geraak as wat ons gehoop het hulle sou nie,” het Mnyupe gesê.

Onlangse vooruitgang het egter die belangstelling aangewakker wat Namibiërs nou in die bedryf het, het hy gesê.

“Ek dink twee jaar later het die vlak van belangstelling wat Namibië gelok het, baie mense se oë nou oopgemaak vir die geleentheid wat daargestel is,” het hy gesê.

VOORGESTELDE AANDEEL

Met betrekking tot die omstrede kwessie van die voorgestelde aandeel in Hyphen, het Mnyupe gesê Namibië sal groot voordeel daaruit trek, want dit gebruik toelae om ’n uitvoerbaarheidstudie na die lewensvatbaarheid van die projek te finansier, en nie die land se eie hulpbronne nie.

“As ons by die finansiële afsluitingsfase vir Hyphen kom en ons het die uitvoerbaarheidstudie gedoen, en die projek word as haalbaar geag – beide in terme van finansies en die omgewing – kan ons ons ekwiteitsbelang verkoop, ’n bietjie geld maak en ’n bietjie rykdom behou,” het hy gesê.

“Die 40 miljoen euro wat ons kry in toelaefinansiering is nie ’n lening nie, so as ons 23 miljoen euro bestee, 24 miljoen euro om Hyphen te ontwikkel en Hyphen werk nie uit nie, skuld ons niemand geld nie,” het hy bygevoeg. – [email protected]