Grafietaanleg amper voltooi

Die Aukam-grafietaanleg nader spoedig sy kommersiële ingebruikneming, volgens die maatskappy Gratomic wat op die Toronto-aandelebeurs genoteer is. Dié voorloper in die verskaffing van grafiet om in die vervaardiging van battery-anode in elektriese voertuie te gebruik, het op 30 Junie inligting oor die aanleg se vordering verskaf.Volgens Gratomic is daar reeds met die voorbereiding begin om die eerste 100 ton grafiet na kliënte te stuur vir die finale insluiting in kliënte se aanwending tot waardetoevoeging.Aukam se hooffokus in produkontwikkeling was om ’n wêreldvoorloper te word in die suksesvolle grootmaat-gebruik van grafiet wat in Namibië ontgin kan word. “Die afgelope vier maande het grondspanne onverpoos gewerk om hierdie belangrike prestasie te bereik,” volgens die maatskappy.Gratomic waarsku egter beleggers in dieselfde asem dat daar geen ekonomies vatbare grafietmineraalafsettings op sy Aukam-perseel gevind is nie. Die maatskappy het wel onlangs ’n betroubare verkoopsverteenwoordiger in Europa aangestel om al die grafiet wat nie vir anode bruikbaar is en wat die maatskappy oor die duur van mynboubedrywighede by Aukam vervaardig, te verkoop. Die voorsiening van grafiet aan die aanleg is ook uitgewys as ’n vereiste vir toekomstige sukses.Verder is daar geen voorlopige lewensvatbaarheidstudie of enige uitvoerbaarheidstudie van mineraalreserwes uitgevoer nie. Nogtans kon Gratomic met die hulp van ’n vennoot Graphex Technologies vordering maak met die bou van die aanleg. Graphex is ’n Amerikaanse grootmaat-grafietverskaffer vir die gebruik in litium-ioon batterye, en fokus op navorsing en ontwikkeling van toepaslike tegnologieë.Oor die volgende vier tot ses maande sal Gratomic die Aukam-vervaardigingsaanleg kalibreer om grafiet op groot maat en volgens verbruikerspesifikasies te kan lewer. “Hierdie program is die laaste stap voor die fasiliteit operasioneel sal wees. Sodra die aanleg heeltemal operasioneel is, sal die maatskappy daarop fokus om die koste te verfyn om die beste uitkoms vir alle betrokke partye te verseker. “Die fase om koste te optimaliseer, sal die installering van sonkrag op die perseel behels om die totale elektrisiteitskoste en ons omgewing, maatskaplike en bestuursvoetspoor te verminder,” luidens die verklaring wat deur Gratomic se president en uitvoerende hoof, Arno Brand, onderteken is. “Die oorgang na hierdie reuseprestasie vir die maatskappy is werklik ongelooflik. Ons het gely onder moeilike marktoestande die afgelope 18 maande. Nietemin was ons vasbeslote om te volhard sonder om die doelwit uit die oog te verloor ten spyte van enige uitdagings wat ons teëgekom het. Aan die aandeelhouers, julle steun het ons die nodige middele gegee om ons doelwitte te bereik,” voeg Brand by. – augetto@republikein.com.na

Grafietaanleg amper voltooi

Kommentaar

Republikein 2026-05-06

Meld asseblief aan om kommentaar te lewer

Grafietaanleg amper voltooi

Kommentaar

Republikein 2026-05-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.