Goudmyn lê werkers af, delf dieper

Die Otjikoto-goudmyn (ML169) se oopgroefbedrywighede sal volgende jaar nie meer uitbrei nie en daarom word 300 werknemers vanjaar nog afgelê, met ’n verdere 250 werksverliese wat vir 2025 beplan word.B2Gold oorweeg die ondergrondse ontginning van sy nuut ontdekte Antilope-goudafsetting sowat drie kilometer suid van sy oopgroefmyn.Volgens die Kanadees-genoteerde mynmaatskappy se bestuurder in Namibië, John Roos, is die ontdekking &#039;n belangrike mylpaal wat beperk is tot ondergrondse mynbou. Hy het egter erken: “Dit is moeilik om aan sekere werknemers te verduidelik dat hulle afgelê word terwyl ons die mark inlig dat ons meer hulpbronne ontdek het.”Die kernboodskap is die oorgang na ondergrondse mynbou, waar daar aan minder en verskillende mannekragvereistes voldoen moet word, het hy gesê.REKORDJAARDie Otjikoto-goudmyn het met ’n omset van N$7,681 miljard vir 2023 gespog danksy goudproduksie van 208 598 onse en goudverkope van 214 800 onse, insluitend ’n bietjie goud uit sy eie voorraad. “Dit was ’n rekordjaar,” het Roos gesê en die hoë internasionale goudprys en die wisselkoers as bydraers uitgelig.Die myn se 820 werknemers het verlede jaar altesaam N$723 miljoen se salarisse verdien, terwyl die regering N$1,515 miljard aan belasting en heffings ingesamel het.Van die totale verkryging ter waarde van N$3,172 miljard in die loop van 2023, is 61% – ofte wel N$1,962 miljard – in Namibië bestee. Dit terwyl N$1,21 miljard in die buiteland bestee is, hoofsaaklik vir die invoer van reagense, groot internasionale kontrakteurskoste en onderdele vir swaar toerusting, soos CAT-masjinerie, het Eric Barnard, die myn se algemene bestuurder, gesê.Verder is N$23 miljoen aan verskeie welsynsprojekte en gemeenskapsontwikkeling, veral in Otavi en Otjiwarongo, bestee.B2Gold Namibia se aandeelhouers trek voordeel uit die myn se 2023-wins van N$2,119 miljard. Die meerderheid – 90% – van die maatskappy behoort aan die genoteerde B2Gold Corporation, terwyl die plaaslike vennoot EVI Mining ’n 10%-belang besit.LEWENSDUUR VAN MYNDie myn wat tussen Otavi en Otjiwarongo geleë is, het sy eerste goud in Desember 2014 gelewer, met kommersiële bedrywighede wat op 1 Maart 2015 begin het. Sy opgroefmyn het sedertdien tot byna drie kilometer in lengte gegroei en in 2020 is die ontwikkeling van die ondergrondse myn van die Wolfshag-neerslag begin, wat in 2022 in werking getree het.Gedurende 2023 is 38 boorgate geboor om die ertsligging van die nuwe Antilope-ontdekking te bepaal en volgens Roos kan &#039;n minerale hulpbronskatting reeds in die tweede helfte van vanjaar verwag word, met &#039;n beleggingsbesluit vroeg in 2025.Dit sal beteken dat die lewensduur van die ondergrondse myn van 2026 tot 2032 verleng sal word deur &#039;n bykomende belegging van US$9 miljoen (N$170 miljoen).Gemiddelde goudproduksie van 40 000 onse per jaar sal tot 2032 tot sowat 100 000 onse per jaar toeneem, het Roos gesê.Werknemers is tot 30 April die geleentheid gebied om skeidingspakkette te aanvaar, gebaseer op die lengte van hul diens en ’n algemene formule.Beleggings in gemeenskapsontwikkeling, soos die Primêre Skool Ombili op Otavi wat 1 300 leerlinge sal kan akkommodeer, sal teen 2025 voltooi wees, terwyl die Ombili-kliniek teen Desember opgegradeer sal word. Otavi se waterretikulasie word ook verder verbeter, het Roos gesê. – augetto@republikein.com.na

Goudmyn lê werkers af, delf dieper

Kommentaar

Republikein 2025-04-30

Meld asseblief aan om kommentaar te lewer

Goudmyn lê werkers af, delf dieper

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie