Beplande kusaanleg fokus op suurstofproduksie

’n Voorgestelde groenwaterstofprojek buite Swakopmund beoog grootskaalse suurstofproduksie as sy kernbedrywigheid, met die ontwikkelaars wat ’n plan uiteensit om nywerheids- en mediesegraadsuurstof saam met waterstof en verwante neweprodukte te verskaf.Die omgewingsassesseringsproses het reeds begin, met Togreen Consulting wat openbare insette van Jan Publiek versoek.Volgens Togreen se omgewingspraktisyn, Abraham Kanime, is die projek ontwerp rondom die gelyktydige opwekking van waterstof en suurstof deur alkaliese elektrolise.“Seewater is die primêre grondstof vir die produksie van waterstof- en suurstofgasse,” het hy verlede week tydens ’n openbare vergadering in Swakopmund gesê. Volgens Kanime sal die aanleg staatmaak op hernubare energie en ’n stelsel wat suurstof van hoë suiwerheid vir plaaslike markte kan produseer. “Die proses behels die grootmaatberging en hantering van saamgeperste waterstof en suurstof, wat dit ’n gelyste aktiwiteit onder die wet maak,” het hy gesê.Die voorstel sluit die konstruksie van kapasiteit vir ontsouting, ’n seewaterpypleiding van tot sewe kilometer, infrastruktuur vir die afvoer van pekelwater, nuwe pyplyne en interne energie-opwekkingstelsels in.Die terrein vir die projek beslaan 200 hektaar onontwikkelde munisipale grond naby die C34-pad en die rioolwerke. Alhoewel dit reeds vir toekomstige ligte nywerheidsgebruik geoormerk is, sê die konsultante die ontwikkeling sal effektief oop openbare grond in ’n grootskaalse nywerheidsone omskep.Die konsep van die aanleg bestaan uit hernubare energieopwekking, waterstof- en suurstofproduksie deur alkaliese elektrolise, kompressie en berging en finale verspreiding. Die suurstof sal in vloeibare vorm gestoor en voorsien word. Die voorstel sluit ook ammoniak, ureum, sout en moontlike herwinning van seldsame aardmetale uit pekelwater in.“Die Namibiese regering het ’n platform geskep om beleggers na die waterstofekonomie te lok. Die voorgestelde projek dra tot daardie ontwikkelingsagenda by,” het Kanime gesê en bygevoeg dat Odula Hydrogen ’n omgewingsklaringsertifikaat soek om met ontwikkeling te begin.Die proses vir die omgewingsimpakstudie (EIA) sluit openbare vergaderings, spesialisstudies en ’n volledige beoordeling van enige impak op die omgewing in.– adam@erongo.com.na

Beplande kusaanleg fokus op suurstofproduksie

Kommentaar

Republikein 2026-02-25

Meld asseblief aan om kommentaar te lewer

Beplande kusaanleg fokus op suurstofproduksie

Kommentaar

Republikein 2026-02-25

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.