Beleid oor plaaslike inhoud onder loep

Die ministerie van myne en energie het verlede week ’n beraad in Windhoek aangebied om die nuwe beleid oor plaaslike inhoud vir die ontluikende oliebedryf in Namibië te bespreek. Die fokus is tans op hoe Namibiërs deel van die onlangse olie-ontdekkings langs die suidkus van Namibië kan wees en kan baat uit die hoë inkomste wat na verwagting uit olieproduksie gegenereer sal word.Die minister van myne en energie, Tom Alweendo, sê dié ontdekkings bied groot potensiaal om die ekonomie te verander, buiten vir die inkomste wat na verwagting deur belasting en tantième aan die staat verskuldig sal wees.Die nuwe beleid moet dus verseker dat Namibiese burgers daarby sal baat en waardetoevoeging binne die land plaasvind. “Ons weet van lande waar die ontdekking van olie ’n vloek is en daar is ook lande waar dit ’n seën is,” sê hy. Sterk instansies, ’n stabiele politieke stelsel en ’n doeltreffende wetlike raamwerk, stel lande in staat om die inkomste uit olie so te bestuur om ’n positiewe impak op die ekonomie te maak en sy burgers te bevorder, brei hy uit. Plaaslike inhoud – in terme van die beleid – behels hoe plaaslike werknemers en entrepreneurs aan die olie- en gasbedryf sal deelneem. Dit deur opleiding, werkskepping en die plaaslike aankoop van goedere en dienste, volgens die minister. Betrokke maatskappye sal jaarliks ’n gebruiksplan vir plaaslike inhoud vir goedkeuring moet indien, volgens die konsepbeleid op die ministerie se webwerf. Alweendo sê die beleid moet goed ontwerp, maar ook doeltreffend toegepas word. Die beleid moet Namibië se werklikheid en prioriteite weerspieël, voeg hy by. Internasionale maatskappye sal die beleid moet ken en volg. “Al die rolspelers sal ons self moet voorberei deur vooraf die nodige vaardighede te ontwikkel,” sê hy. Die minister waarsku teen ’n kultuur van aanspraak wat die doelwitte van die beleid sal belemmer. Hy moedig entrepreneurs aan om die nuwe bedryf goed te bestudeer en te verstaan wat nodig is vir doeltreffende deelname. “Ons sal as sakemense en lede van die samelewing beter af wees as ons ’n kultuur van meriete in teenstelling met aanspraak kan bevorder,” sê hy. Inklusiwiteit en deursigtigheid is van belang vir die beleid, sê Alweendo en waarsku teen groot ongelykhede in die samelewing wat tot onrus kan lei. In haar sluitingstoespraak het die adjunkminister in die ministerie, Kornelia Shilunga, die bydraes van Emanuel Inocencio Leopoldo van Angola se nasionale raad, Namcor, plaaslike oliemaatskappye, sakelui en die plaaslike bankwese – die Afrika Energiekamer, ENS Africa, Kaeso, Halliburton, SLB, Shell Namibia, TotalEnergies, BW Energy, Capital en Vantage geprys. “Julle deelname demonstreer die algehele toewyding om gesamentlike oplossings vir plaaslike uitdagings te soek en om die volhoubare ontwikkelingsdoelwitte van ons land te bereik,” sê sy. – augetto@republikein.com.na

Beleid oor plaaslike inhoud onder loep

Kommentaar

Republikein 2026-02-03

Meld asseblief aan om kommentaar te lewer

Beleid oor plaaslike inhoud onder loep

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.