AR sal petroleumwetsontwerp in ‘hoogste hof betwis’

Die Affirmative Repositioning (AR) sê hy berei hom voor om die grondwetlikheid van die wysigingswetsontwerp op petroleum tot in die hoogste hof te betwis indien dit in sy huidige vorm wet word. Die AR-leier en parlementslid, Job Amupanda, waarsku voornemende beleggers dat die regstryd Namibië se olie- en gassektor vir nog vyf jaar onseker kan laat, het hy Sondag tydens ’n onderhoud op The Agenda gesê. Hy het benadruk die beweging het reeds ’n beëdigde verklaring gereed en sal ’n hofuitdaging van stapel stuur sodra die president die wetgewing onderteken.“As julle gaan kom en hierdie ding doen op grond van hierdie petroleum, berei julle weer vir nóg vyf jaar voor, want ons gaan hierdie grondwetlikheid betwis en ons sal dit tot in die hoogste hof betwis,” het Amupanda gemaan.Hy het gesê AR wil hê beleggers moet verstaan dat parlementêre goedkeuring nie noodwendig finaliteit aan die voorgestelde veranderinge sal bring nie.“Ons kan julle reeds vooraf sê dat ons daardie petroleumwetsonwerp gaan betwis,” het hy gesê en maatskappye aangemoedig om nie beleggingsbesluite te baseer op die aanname dat die wetsontwerp sonder verdere regsuitdaging sal deurgaan nie,” het Amupanda beklemtoon.Die waarskuwing kom terwyl Namibië homself as ’n groot olieproduserende land probeer posisioneer, met die voorgestelde wetgewing wat daarop gemik is om te hervorm hoe sy Upstream-petroleumbedryf gereguleer word.Die wysigingswetsontwerp op petroleum (eksplorasie en produksie) poog om kernverantwoordelikhede oor regulering van die ministerie van myne, energie en nywerheidsontwikeling na ’n nuwe eenheid vir Upstream-petroleum (UPU) in die kantoor van die president te verskuif.Onder die voorgestelde raamwerk sou die eenheid sake toesig hou oor onder meer petroleumlisensiëring, nakoming, petroleumdata en plaaslike inhoud. Die president sou ook strategiese bevoegdhede oorneem, insluitend besluite rakende regulasies en die kwytskelding en uitstel van tantième.Amupanda se kernbeswaar is dat die veranderinge magte in die presidensie konsentreer en parlementêre aanspreeklikheid verswak deur verantwoordelikhede weg te skuif van ’n minister wat aan die parlement verantwoording doen.In ’n debat in die Nasionale Vergadering op 30 September het hy aangevoer dat die wetsontwerp magte van die minister na die president en die direkteur-generaal van die voorgestelde eenheid oordra, terwyl funksies wat voorheen deur die petroleumkommissaris uitgeoefen is, na die eenheid se adjunk-direkteur-generaal sou skuif.Hy het gesê die nuwe amptenare sou deur die president aangestel word en sou nie op dieselfde wyse as ’n minister aan die parlement aanspreeklik wees nie.“Die wetsontwerp skend die Namibiese Grondwet in baie opsigte,” het Amupanda gesê en aangevoer dat die voorgestelde reëling vrae laat ontstaan oor uitvoerende aanspreeklikheid en die grondwetlike beginsel van die oppergesag van die reg.Hy het ook bepalings bevraagteken wat die president toelaat om bevoegdhede oor petroleumtantième en regulasies uit te oefen, en aangevoer dat die parlement betekenisvolle toesig oor besluite in ’n sektor met potensieel beduidende nasionale inkomste sou verloor.Op 20 Oktober het 50 parlementslede in die Nasionale Vergadering ten gunste van die wetsontwerp gestem. Opposisiepartye het tydens die verrigtinge uit protes uitgestap.Die wetgewing moet nog deur gedetailleerde komitee-ondersoeke en verdere parlementêre fases gaan voordat dit na die Nasionale Raad gestuur kan word en uiteindelik na die president vir bekragtiging.Die presidensie het die voorgestelde herstrukturering verdedig en aangevoer die plasing van die reguleerder in die kantoor van die president sal besluitneming versnel en dat die raamwerk voldoende kontrole en teenwigte bevat.Amupanda het egter gesê die AR bly oop vir betrokkenheid en veranderinge aan die wetsontwerp, eerder as dat litigasie die enigste roete is.“Ons is ook redelik om te sê betrek ons, betrek ons,” het hy gesê en bygevoeg dat die beweging bereid is om ander sienings te oorweeg en waar nodig kompromieë aan te gaan.BRANDSTOFPRYSE SKOKIntussen het brandstofpryse vandag gestyg met motoriste wat N$2 meer per liter vir petrol moet opdok, terwyl dieselpryse met N$3 per liter sal styg.Die verhoging kom te midde van stygende verskepingskoste en ’n swakker Namibiese dollar, wat die koste van brandstofinvoer opstoot – ten spyte van ’n effense daling in internasionale brandstofpryse.Die Nasionale Energiefonds se onderverhaling het tot N$384 miljoen toegeneem, wat die druk op die regering verhoog om brandstofpryse by die pompe aan te pas.Die regering sê brandstofvoorrade bly stabiel, met geen onmiddellike risiko van tekorte nie.Vir die landbousektor wat herstel ná ’n lang droogte, tans ly onder die uitbreking van bek-en-klouseer en moontlik nóg droogte moet trotseer weens die dreigende El Niño-weerverskynsel, is die skerp styging in dieselpryse ’n reuseskok en terugslag.“Die regering kry salaris aan die einde van elke maand, maar die produsente tjop af!” het ’n boer gesê.– phillipus@nmh-hub.com.na

AR sal petroleumwetsontwerp in ‘hoogste hof betwis’

Kommentaar

Republikein 2026-11-04

Meld asseblief aan om kommentaar te lewer

AR sal petroleumwetsontwerp in ‘hoogste hof betwis’

Kommentaar

Republikein 2026-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.