Visbedryf gekant teen fosfaatmynbou

Die Konfederasie van Namibiese Visseryeverenigings (CNFA) het Maandag sterk beswaar gemaak teen voordurende pogings vir fosfaatmynbou op die seebodem langs die kus by Walvisbaai. Mnr. Matti Amukwa, CNFA se voorsitter, sê in ’n verklaring die konfederasie “het die talle wetenskaplik-gebaseerde bekommernisse van die voorgestelde Sandpiper-projek se toetsmynboubedrywighede op rekord geplaas, waarvan die minste nie die geprojekteerde verspreiding van swaarmetale in die stok- en monnikvis se broeigebiede is nie.” Die waarskuwing is in reaksie tot ’n beplande verifiëringsdokument wat die Mariene Ruimtelike Beplanning (MSP) se komitee saamgestel het.Amukwa sê die CFNA het aan slypskole deelgeneem wat die MSP aangebied het, om ’n deursigtige proses vir die bestuur van mariene bedrywighede te bewerkstellig.“Ten spyte van die visseryeverenigings se herhaalde waarskuwings en besware teen eksperimentele fosfaatontginning, word daar nie aan hul besware in die MSP se finale dokument gehoor gegee nie. Die MSP het ’n dokument vrygestel wat verklaar dat fosfaatontginning “gunstig in die mariene ruimtelike plan aangeneem is”, en op soek is na ’n voorkeurmyntoetsopsie vir fosfaat op die Namibiese seebodem, vir &#039;n proeftydperk van vyf jaar,” brei hy uit.“Dit is waarskynlik tot nadeel van die visbedryf in Namibië, en ’n fundamentele botsing met insette wat die Konfederasie van Namibiese Visseryeverenigings verskaf het,” voeg hy by. “CNFA neem kennis van reusebeleggings in bykomende hawe-, varswater-, elektrisiteit- en vervoerinfrastruktuur wat nodig sou wees om die voorgestelde 5 miljoen ton fosfaatrots te verwerk en uit te voer. “Dit sluit byna 8 000 kubieke meter drinkwater in, wat nodig is om die fosfaat van soutwater skoon te maak. Sulke beleggings in &#039;n twyfelagtige onderneming is vir Namibië onverdedigbaar in hierdie tyd van ongekende honger, armoede en werkloosheid,” sê hy.“In die hoogs voorsienbare geval dat sulke baggeroperasies, wat hoogs giftige kernmateriaal insluit, katastrofies vir die visbedryf in Namibië blyk te wees, is dit onwaarskynlik dat beleggers in die fosfaatmynbousektor hul verliese sal wil verminder en onttrek.”Die Economic and Social Justice Trust (ESJT) het Maandag hul steun aan die visseryeverenigings gegee. “Dit is nie toevallig dat byna elke land in die wêreld mariene fosfaatmynprojekte verbied het weens die hoë en blywende risiko&#039;s wat daarmee gepaard gaan nie. “Ervarings wêreldwyd het getoon swaarmetale en radioaktiewe elemente van fosfaatmynbou kan tot ernstige besoedeling lei. Radioaktiewe materiale soos uraan en torium is veral tipies in mariene fosfaat gekonsentreer,” lui die organisasie se verklaring. Spesifiek noem hulle die kommer dat afvalwater wat gebruik word om die verwagte 5 miljoen ton slyk te onttrek, terug in die see kan loop, of ondergrondse varswaterbronne wat Walvisbaai voorsien, kan besmet.” Die ESJT doen ’n beroep op die regering om alle voorgestelde mariene fosfaatmynprojekte in Namibië te staak.Intussen oorweeg die ministerie van die omgewing, bosbou en toerisme Namibian Marine Phosphate (NMP) se nuutste aansoek vir ’n omgewingsklaringsertifikaat om met die Sandpiper-projek voort te gaan. Die omgewingsklaring is voorheen opgeskort en die kern van ’n lang hofsaak wat verlede jaar afgehandel is, met die hofbeslissing dat die betrokke mynboulisensie geldig is, maar daar weer vir omgewingsklaring aansoek gedoen moet word. Insette oor dié aansoek word tot volgende week Maandag nog deur die ministerie aanvaar. – augetto@republikein.com.na

Visbedryf gekant teen fosfaatmynbou

Kommentaar

Republikein 2022-08-10

Meld asseblief aan om kommentaar te lewer

Visbedryf gekant teen fosfaatmynbou

Kommentaar

Republikein 2022-08-10

Meld asseblief aan om kommentaar te lewer

MELD AAN