Petrosol vier kwarteeu glansryk

Die plaaslike brandstofverspreider Petrosol het Donderdag sy 25ste bestaansjaar met ’n glansryke geleentheid by die Otjiwarongo-vliegveld gevier.

In die teenwoordigheid van die eregas, streekgoeweneur van Otjozondjupa, John //Khamuseb, en ikoniese grapjas, Neville Basson, is vennote, kliënte en verskaffers met vuurdansvertonings, smulkos, heildronke en vlymskerp humor vermaak.

Stigter en uitvoerende hoof, Johan Botes, het in die hoofstoespraak vertel van hul reis tot sukses van Northern Fuel Distributors (NFD), waarin Petrosol vandag die bekende handelsmerk van die besigheid se kleinhandel-afdeling is.

Ná hulle die Caltex-agentskap in 2001 op Otjiwarongo oorgeneem het, was daar maar ’n handjievol kliënte om in en om die dorp te bedien, vertel hy. 

“Oor die jare het ons besigheid gegroei en uitgebrei tot waar ons vandag meer as 25 kleinhandelpersele onder Petrosol bedien en honderde kommersiële tenks en kliënte oor die hele lengte en breedte van ons land onder Northern Fuel Distributors bedien,” het Botes gesê. 

“Ons beskik oor ’n vloot van 25 brandstofvragmotors waarmee ons net ons eie kliënte bedien. Ons het ook verskeie brandstofdepots oraloor Namibië. Ons het ’n hele afdeling waarmee ons ons eie tenks en installasies oor die hele land doen. 

“Ons besigheid het werklik gegroei tot seker die grootste en mees diverse private oliemaatskappy in Namibië. Soms kort ’n mens net ’n geleentheid,” het hy gesê.

Botes het vir Frik Louw, Pieter le Roux, tannie Dollie Sandman, sy vrou Christa en kinders Jano en Ankia, sy vennoot Pierre Fourie, sy ouers, die onderneming se personeelslede en vir God in sy bedanking uitgesonder. 

“Baie dankie aan al ons diens- en produktverskaffers. As ons nie by julle produkte kry nie, dan het ons niks om aan ons kliënte te bied nie,” het hy bygevoeg en vir Total Energies, Puma Energy en Vivo vir die waardevolle jare lange verhouding en verbintenis bedank.

“NFD/Petrosol is ’n ware Namibiese sukses. Dit is 100% in Namibië deur Namibiers vir Namibië gestig.”

Botes het ook gewaarsku dat Namibië se vreedsame stabiliteit deur korrupsie, armoede en werkloosheid bedreig word. 

“Die oplossing tot hierdie probleme sal ’n gesamentlike poging van die regering en die privaat sektor verg,” sê hy.

Fourie het gesê: “Vyf-en-twintig jaar gelede het ek en Johan Northern Fuel gestig met die oorname van ’n klien agentskap hier in Otjiwarongo. Dit was 25 jaar van vele uitdagings, vele geleenthede maar ook heelwat struikelblokke om te oorkom. 

“Ons het daardie tyd vir mekaar gesê dat ons besigheid nie kan bly lyk soos die dag toe ons dit oorgeneem het nie. Ons moes verbeter en vernuwe,” het hy benadruk. 

“Ons het die pad van natuurlike groei gevolg. Geen vinnige en geforseerde groei nie, maar ons het met omsigtigheid probeer omgaan en berekende risiko’s geneem. 

“Ons het uitgebrei deur betrokke te raak by bedrywighede wat natuurlik voortgevloei het uit ons bestaande besigheid en wat ons bestaande besigheid kon ondersteun of komplementeer,” het Fourie gesê. Hier 25 jaar later dink ek dit is gepas om ons waardering uit te spreek teenoor almal wat deel was van ons reis,” het hy gesê.

Günther Kahl van Ekundi Farming het namens die besigheid se kliënte gesê: “In 2001 het die idee, droom, passie, energie, harde werk en besigheidsvernuf begin om by hierdie mylpaal uit te kom. 

“Die erkenning en respek wat julle vir die produk en aflewering ontvang is fenomenaal tot julle besigheid.”

– [email protected]