Namdia koop weer diamante

Namdia gaan weer diamante koop nadat die laaste aankope in September verlede jaar gedoen is. Namib Desert Diamonds (Namdia) is die regering se diamantbemarkings- en verkoopsmaatskappy. Namdia se hoofdoel is om diamantpryse op die internasionale mark te volg en sodoende beter pryse vir Namibië se diamante te kry. Diamantpryse het die afgelope paar maande erg verswak as gevolg van groot hoeveelhede voorraad en ’n kleiner vraag na natuurlike diamante. Dit is deels weens die sukses van diamante wat in ’n laboratorium gekweek word wat veral nou in verloofringe gebruik word. “Namdia sal in Januarie 2024 vir sy komende verkoopsiklus diamante aankoop. Dit is die eerste aankope sedert September 2023,” het die staatsonderneming se uitvoerende hoof, Alisa Amupolo, by navraag gesê. Namdia is geregtig om maandeliks ŉ 15%-aandeel van Namibia Diamond Trading Company (NDTC) se diamante te koop. “Ten spyte van laer winste as gevolg van heersende marktoestande, kon Namdia suksesvol sy September-voorraad in Desember 2023 verkoop,” het sy gesê.Die bedryf het weens voortgesette uitdagings nog nie heeltemal van die huidige ekonomiese afswaai herstel nie, maar volgens Amupolo bly Namdia egter optimisties oor die mark se verbetering. Sedert September 2023 was daar ’n afname in die voorraad geslypte diamante en het De Beers volgens haar pryse op sy eerste verkope vir die jaar verlaag. Diamante wat in laboratoriums gekweek word, hou egter steeds ’n bedreiging vir die natuurlike diamantbedryf in. Die Indiese regering se ophef van ’n vrywillige invoerverbod het intussen die balans tussen vraag en aanbod effens gestabiliseer, sê Amupolo. Nog ’n belangrike verwikkeling is dat die G7-sanksies op Russiese diamante op 1 Januarie 2024 in werking getree het.“Namdia se kliënteverhoudings het positiewe resultate opgelewer wat ons in staat stel om al ons kliënte te behou. Die lojaliteit en toewyding van ons kliënte weerspieël die ondersteuning wat tydens die Covid-19-pandemie getoon is en dien as ֹ’n bewys van Namdia se onwrikbare toewyding om blywende en wedersydse voordelige verhoudings te bou,” sê Amupolo“Met die inagneming van die destydse markonsekerheid en pessimistiese vooruitsigte het Namdia besluitom voorraad gedurende Desember 2023 te verkoop om enige waardevermindering te versag. Tweedens het ons kostebeperkingsmaatreëls in ons bedrywighede geïmplementeer. Laastens bly Namdia waaksaam in die monitering en beoordeling van marktoestande om ons verkoopstrategie beter te bepaal.” Gebaseer op huidige finansiële ontleding en operasionele evaluerings, is Namdia volgens Amupolo in ’n veilige finansiële posisie wat beteken daar is geen behoefte aan staatsingryping nie. Amupolo het beklemtoon Namdia sal voortgaan met sy mandaat om die ware waarde van Namibië se diamante ten bate van alle Namibiërs te bepaal.“Namdia beplan om voortgeset daarna te streef om sy mandaat van prysontdekking na te kom asook sy implementering van gemeenskapsprojekte deur die Namdia-stigting ,” sê Amupolo. – augetto@republikein.com.na

Namdia koop weer diamante

Kommentaar

Republikein 2025-04-30

Meld asseblief aan om kommentaar te lewer

Namdia koop weer diamante

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie