Mynbouer raap prys in SA op

Bannerman Mining Resources (Namibia) het as wenner van die 2023 ESG Forum-toekenning vir die kategorie gemeenskapsbetrokkenheid by die jaarlikse Afrika Mynbou-indaba in Kaapstad, Suid-Afrika, uit die stryd getree. Die toekenning vir omgewings- en maatskaplike bestuur (ESG) gee erkenning aan dié Australiese mynmaatskappy – wat die Etango-uraanmynprojek in die Erongostreek bevorder – se vroeë leerling-hulpprogram wat in 2011 gestig is.Die mynbou-indaba is die grootste Afrika-konferensie vir die bedryf ter wêreld en sy gesogde ESG-toekenning kom met groot eer, volgens die genoteerde maatskappy. Ten spyte daarvan dat mynbedrywighede nog nie by Etango afgeskop het nie, hou die maatskappy steeds met die program vol, wat destyds deur die voormalige minister van onderwys, dr. Abraham Iyambo, van stapel gestuur is. Bannerman nader die ministerie van onderwys, kuns en kultuur deur die program om met die hulp van skoolhoofde in ses streke, leerlinge te identifiseer wat kwesbaar is om die skool te verlaat.Sorgpakkies wat aan dié leerlinge se behoeftes voldoen, word saamgestel en Bannerman se werknemers lewer dié pakkies persoonlik af. Tot op hede het 3 300 leerlinge by die projek gebaat, en die maatskappy beplan om nog 300 leerlinge vanjaar te help. Die program is so ontwerp dat ander mynbouers ook kan bydra, met Namibia Rare Earths wat dié jaar ook aangesluit het. Laurie Clark van die Onyen-korporasie sê die uitbreidingsvermoë van die projek het dit laat uitstaan.Sy het die betrokkenheid van verskeie belanghebbers, insluitend die plaaslike gemeenskappe en die hoogste vlak van die regering, geprys. Bannerman se uitvoerende hoof, Brandon Munro, was verheug om die toekenning op 7 Februarie in ontvangs te neem, en noem dit een van die wêreld se mees gesogte erkennings. “Ons is nog meer dankbaar vir die direkte positiewe impak wat die program op die lewens van leerlinge en hul families in Namibië het.“Ons glo hierdie ondersteuning het ook ’n impak op onderwysers en skoolhoofde, en motiveer ons passievolle werknemers. Dit is baie bevredigend dat ons die program in 2011 bekend kon stel en om die positiewe impak te sien ná meer as ’n dekade,” sê hy. Bannerman Namibia se besturende direkteur, Werner Ewald, sê die maatskappy se werknemers het al amper 15 000 km na verafgeleë dorpe gery om self die sorgpakkies met skoolklere, skryfbehoeftes, rugsakke, sokkies en skoene af te lewer. “’n Gebaar wat elke leerling wys dat hulle spesiaal is en waardig is om hulp te ontvang,” sê hy. – augetto@republikein.com.na

Mynbouer raap prys in SA op

Kommentaar

Republikein 2025-12-16

Meld asseblief aan om kommentaar te lewer

Mynbouer raap prys in SA op

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.