Husab groei steeds

Swakop Uranium se derde weergawe van sy volhoubaarheidsverslag vir 2021 is Donderdag by die Hilton Hotel in die hoofstad vrygestel.Dié verslag vervat die jaarlikse basislyn waarteen die Husab-uraanmyn sy ontwikkeling meet en waarmee Namibië se grootste myn vir die einde van sy leeftyd voorberei. Die wêreld se tweede grootste uraanmyn gemeet teen uraanoksied (U₃O₈)-produksie, groei steeds sedert hy in 2016 uraan begin vervaardig het. Die myn het verlede jaar November die mylpaal bereik om ’n miljoen ton in ’n maand deur sy meule te verwerk. Vir die jaar is 103 miljoen ton grond gemyn, 4% meer as verwag. Die hoeveelheid erts wat vervaardig is, was nogtans 3% minder as verwag, alhoewel die gehalte van die erts beter was en vir ’n 8% verbeterde deurvoergraad gesorg het. In 2021 is 3 902 ton uraanoksied vervaardig teenoor 3 893 ton in 2020.Uitdagings insluitend ’n watertekort het egter veroorsaak dat 8,45% minder deur sy meule gevoer is en die finale produk was dus 11,27% minder as waarvoor begroot is. Waterverbruik in 2021 was meer as 8,3 miljoen kubieke meter teen 0,8 kubieke meter per ton, wat 19% meer as die begroting was. Die afgelope vyf jaar is verliese aan produksie van gemiddeld 400 ton uraanoksied per jaar aangeteken weens onderbrekings in watertoevoer. Swakop Uranium is deel van ’n groep uraanmyne wat die regering genader het om te help om ’n tweede ontsoutingsaanleg te bou. Husab gebruik tans tot 70% van die water wat deur die Orano-ontsoutingsaanleg naby Swakopmund gesuiwer word.Volhoubare kragtoevoer is ook ’n kommer ten spyte daarvan dat die myn sy eie 12 MW-sonkragaanleg gebou het en 15 MW wat die swaelsuuraanleg op die myn teen volle produksie kan lewer.Die ekonomiese en kommersiële raadslid vir die Chinese ambassade in Namibië, mnr. Liu Mingzhe, het by die geleentheid gesê die China General Nuclear Power Group (CGN) – die meerderheid aandeelhouer in die myn – is steeds toegewy tot verdere ontwikkeling. China het deur CGN meer as US$5 miljard in die myn belê, die grootste direkte buitelandse belegging in Afrika, sê hy. Die myn het verlede jaar N$3,2 miljard tot Namibië se ekonomie bygedra deur belasting, salarisse, beleggings en plaaslike verkryging. Die myn het 1 700 permanente werknemers, waarvan 96% Namibiërs is en 2% van die res van Suider-Afrika, asook 1 000 kontrakteurs.Die voorsitter van Swakop Uranium se volhoubare ontwikkelingsraad, me. Inge Zaamwani-Kamwi, het gesê: “Ons is toegewy daartoe om te verseker dat alles wat ons doen, elke besluit wat ons neem rakende produksie, omgewingsbestuur en sosiale verantwoordelikheid, ’n blywende positiewe nalatenskap agterlaat vir die gemeenskappe waarin ons bedrywig is.”Die adjunkminister van myne en energie, me. Kornelia Shilunga, het gesê die myn streef steeds om volle produksie van 5 000 ton uraanoksied per jaar te bereik. Sy het ook uitgelig dat die myn reeds met konsultasie oor die einde van die myn se leeftyd begin het, al word dit eers vir 2036 voorspel, en is slegs vir mynbedrywighede waarmee daar reeds begin is. Eksplorasieboorwerk word op eksklusiewe eksplorasie-lisensiegebiede EPL3138 en EPL3439 voortgesit, met belowende resultate wat vir Hildenhof, Zone 6, die Ida-mineraalafsetting, U6 en U7 asook Holland’s Dome opgeteken is. Herstelwerk en rehabilitasie van die omgewing by Hildenhof, Zone 6 en Holland’s Dome is ook reeds voltooi, volgens Swakop Uranium. – augetto@republikein.com.na

Husab groei steeds

Kommentaar

Republikein 2025-12-17

Meld asseblief aan om kommentaar te lewer

Husab groei steeds

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.