Geingob se eerste besoek aan Namdia

Diamante vir ontwikkeling
President Hage Geingob sê Namibiërs moet hande vat en saam 'n beter nalatenskap opbou.
Augetto Graig
Die staatshoof het Maandag vir die eerste keer sedert die stigting van Namib Desert Diamonds (Namdia) in 2016, die maatskappy se hoofkantoor in Windhoek besoek.

Pres. Hage Geingob is op ’n toer deur die regering se diamantbemarkings- en verkoopsmaatskappy geneem, en kon ongeslypte diamante vashou.

“Ek het hulle baie fyn geëvalueer,” het hy geskerts.

Hy sê Namibiërs is geneig om te spog met die land se rykdom aan natuurlike hulpbronne, maar weet nie veel van die plaaslike edelstene wat min burgers al self gesien het nie.

“Die gebou as al ʼn geruime tyd hier, maar ’n brawe vrou het ’n beroep op my gedoen om hier te wees, en hier is ek,” het hy verwys na me. Alisa Amupolo, die staatsonderneming se uitvoerende hoof wat op 1 Oktober die leisels oorgeneem het.

Amupolo en Namdia se raadsvoorsitter, mnr. Bryan Eiseb, het die president na die raadsaal geneem wat na Geingob vernoem is.

Groot besluite word daar geneem, het die president grappenderwys gesê.

“Ons is ryk hier, in hierdie gebou, volgens wat ek vandag gesien het,” sê hy. Dit na sy blootstelling aan die 15% reg vir die aankoop van diamante vanaf die vennootskap tussen die regering en die diamantreus De Beers se Namibia Diamond Trading Company (NDTC), waartoe Namdia toegang geniet.

Die minister van myne en energie, mnr. Tom Alweendo en sy adjunk, me. Kornelia Shilunga, het die president vergesel.

Alweendo het in sy toespraak gesê Namibië het verlede jaar N$16 miljard in diamante vervaardig, gelykstaande aan sowat 10% van die bruto binnelandse produk (BBP), 40% van uitvoer-inkomste en ’n bydrae van ongeveer 7% tot die staat se jaarlikse inkomste.

Geingob het op sy beurt gesê die volk is deur moeilike tye en mense kla oor werkloosheid en ’n tekort aan behuising: “Hulle beskuldig die regering. Ons sal nou optree,” het hy gesê.

“Ons moet ’n nalatenskap agterlaat. Die probleem met hoop is dat dit gevaarlik is. Sonder hoop sit en ly mense vreedsaam. Wanneer jy hoop het, wil jy by die einde van die tonnel kom. Die tyd het gekom. Ons sal met groenwaterstof en met olie tot aksie oorgaan om ons probleme te takel,” het hy gesê, “maar ons sal nie van diamante vergeet nie.”

Hy het oor sy konsep van die “Namibiese huis” gepraat waarin “alle Namibiese kinders moet saamleef”, en dat burgers moet onthou: “Dit is die enigste land wat julle ’n tuiste kan noem. Hou hande vas sodat ons die diamante gebruik om ons land te ontwikkel, om huise te bou, en klaskamers vir ons mense.”

Geingob sê dit is moeilik om iets op te bou, maar maklik om af te breek, en moedig Namibiërs aan om vas te hou aan die groter konsep.

“Niemand moet voel hulle behoort nie aan hierdie land nie,” het hy herhaal.

Die plaaslike kunstenaar mnr. Hage Mukwendje het die staatshoof by die geleentheid met ’n groot portretskildery verras.

[email protected]

Kommentaar

Republikein 2022-12-05

Geen kommentaar is op hierdie artikel gelaat nie

Meld asseblief aan om kommentaar te lewer