De Beers se hoof besoek Namdeb

Namdeb het vandeesweek gasheer vir De Beers se nuwe uitvoerende hoof, Al Cook, gespeel.

Hy is op toer deur Namdeb se mynbedrywighede geneem.

Namdeb is saam met Debmarine Namibia en die Namibia Diamond Trading Company (NDTC) lede van die groep maatskappye wat in Namibië deur ʼn gelyke vennootskap tussen internasionale diamantreus De Beers en die regering gestig is.

Cook en sy span besoek reeds vanaf 7 Maart verskeie maatskappye in die groep.

Namdeb is die oudste van die drie, en het die geleentheid geneem om met sy mynboubeplanning, afsetting, afstroping, grootmaatstore en rotsskoonmaakoperasies te spog.

Cook het ook die span van OMDis ontmoet, waar hulle hom ingelig het oor die rol wat hulle speel om Oranjemund verder te ontwikkel.

Die besoek is met ’n dinee afgesluit waar die minerale hulpbronbestuurspan ’n insiggewende aanbieding oor die geologie en geskiedenis van diamante in Namibië gelewer het.

Cook is vergesel deur Burger Greeff, De Beers se uitvoerende hoof: tegnies, Kevin Smith, hoof van operasionele verbeterings, Adithi Naidoo, tegniese assistent vir die De Beers HUB, en Victoria Ziegler, De Beers se assistent vir die tegniese uitvoerende hoof.