Cran wil datakoste verlaag

Die regulerende Owerheid vir Kommunikasie in Namibië (Cran) is na bewering besig om ’n plan te ontwikkel om datakoste in Namibië te verlaag.Die ministerie van inligting en kommunikasietegnologie het onlangs sy adjunk, Emma Theofelus, in die sosiale media aangehaal waar sy na dié plan verwys.Sy het só op navraag van die koerant gereageer.“Ja, daar is ’n plan. Ons sal besonderhede deurgee as ons reg is om dit toe te pas,” sê sy. Toe sy gevra is of daar hoop is dat verbruiker nog vanjaar verligting kan geniet, het sy gesê: “Ja, daar is hoop.”Cran is egter nie nou bereid om meer lig op die plan te werp nie. “Cran is in gesprek met lisensiehouers oor die plan en verskeie moontlike opsies, wat nie nou openbaar gemaak kan word nie,” sê die owerheid. Cran se hoof van korporatiewe kommunikasie, Katrina Sikeni, sê die owerheid werk saam met diensverskaffers om die pad vorentoe aan te wys.“Cran is tans in gesprek met lisensiehouers om moontlike oplossings te vind en aan volhoubare maniere te werk om die Namibiese verbruiker te bevoordeel,” sê sy. Volgens haar bespreek hulle ook wat die ideale koste vir data in die land behoort te wees.Datakoste in Namibië plaas die land as die 27ste goedkoopste in Afrika met 5GB-aankope, en 46ste vir verbruikers wat 1GB koop, volgens Sikeni. Die land se geografiese topografie speel ’n groot rol in die faktore wat tot die koste bydra, brei sy uit. “Namibië is ’n groot land met ’n yl bevolking wat baie infrastruktuur vereis. Dit verhoog dan die operateurs se kapitaaluitgawes, waarvan die koste na die verbruiker deurgegee word. “Ander faktore sluit in die hoë koste van toestelle wat daartoe lei dat talle verbruikers nie data kan gebruik nie; die belasting wat op telekommunikasiedienste en toestelle geplaas word; infrastruktuur wat nie genoeg gedeel word nie, ’n gebrek aan elektrisiteit in landelike gebiede, en beperkte mededinging in die telekommunikasiemark,” voeg sy by.Sy sê ook: “Ouderwetse tegnologie soos WIMAX, 2G en 3G moet met 4G- en 5G-dienste vervang word, aangesien hierdie tegnologie meer doeltreffend gebruik maak van spektrum, beter gehaltediens lewer en meer energiedoeltreffend is.”Van die voordele wat die land sal geniet as datakoste verminder word, sluit in die toegang tot die moderne ekonomie, toegang tot e-regeringsdienste, toegang tot e-gesondheid en e-onderwys, om kommunikasie te vergemaklik, groter globale deelname, en ekonomiese groei, het Shikeni gesê. – augetto@republikein.com.na

Cran wil datakoste verlaag

Kommentaar

Republikein 2025-09-16

Meld asseblief aan om kommentaar te lewer

Cran wil datakoste verlaag

Kommentaar

Republikein 2025-09-16

Meld asseblief aan om kommentaar te lewer

MELD AAN

Advertensie