Alle besighede moet wette gehoorsaam

Geen pogings bestaan deur die regering om buitelandse besighede ten koste van plaaslike besighede te ondersteun en te verhef nie. Enige persoon wat hom of haar hieraan skuldig maak, sal gevolglik met die betrokke wette te doen kry. Die Namibiese kabinet veroordeel ook ten sterkste enige optrede wat die publiek aanhits tot oproer, die sluiting van sakepersele en bewustelike oortreding van landswette wat verwarring en chaos veroorsaak.Die minister van inligting en kommunikasietegnologie, dr. Peya Mushelenga, het in ’n sterk bewoorde verklaring verwys na die onwettige optrede van agt sogenaamde aktiviste wat “platforms van strukturele wantroue onder besighede, veral plaaslike teen buitelandse sake-eienaars, skep” en ’n toestand van “chaos en ontwrigting van die openbare orde” stook. Mushelenga het beklemtoon alle sake-eienaars, hetsy plaaslik of buitelanders, moet sonder uitsondering, die wette van die land gehoorsaam. “Die regering sal nie enige sakepersoon, hetsy plaaslik of uit die buiteland, duld wat die landswette verontagsaam nie,” het hy gesê.Die minister het beklemtoon die regulering van besighede in die land is daarop gemik om ’n samehangende en optimale besigheidsomgewing te bevorder, om die voldoening aan die nodige vereistes te verseker en te verbeter en ook positiewe uitkomste te bevorder. Die regulering van besighede val onder die mandaat van die ministeries van nywerheidsontwikkeling en handel (MIT), arbeid, nywerheidsbetrekkinge en werkskepping (MLIREC) en finansies sowel as hul agentskappe. Alle plaaslike en eksterne maatskappye word ingevolge toepaslike wette onder die Wet op die Owerheid vir Sake- en Intellektuele Eiendom (Bipa) beheer en wat regte vir intellektuele eiendom toeken, beskerm en bestuur. Volgens die minister het MLIREC se arbeidsinspekteurs ook voldoende magte om te verseker wette in die werksplek word toegepas. Hy het ook verwys na die konsepwetsontwerp vir die bevordering en fasilitering van beleggings in Namibië (Nipa) wat onder meer aan sakeinspekteurs die verantwoordelikheid gee om die nodige verwante wette toe te pas.Dit is daarom volgens Mushelenga verkeerd en misleidend om te sê daar is twee verskillende wette wat plaaslike en buitelandse besighede in Namibië reguleer. Volgens hom verseker die ministerie van finansies en die Namibiese Inkomste-owerheid (NamRA) nie net die administrasie en bestuur van die nasionale belastingbestuurstelsel nie, maar reguleer ook grenskwessies soos vervalste gebruikersgoedere. Laasgenoemde is dikwels van swakker gehalte en word gemaak of verkoop onder ’n ander persoon se handelsmerk sonder die vereiste toestemming. Volgens Mushelenga is die vernietiging van vervalste goedere ’n “roetine regulerende aktiwiteit” en nie ’n poging om plaaslike besighede in beide informele en formele sektore van die ekonomie te teiken nie.“Dit is van toepassing op alle besighede, hetsy plaaslik of dié van buitelanders.” – henriette@republikein.com.na

Alle besighede moet wette gehoorsaam

Kommentaar

Republikein 2022-08-10

Meld asseblief aan om kommentaar te lewer

Alle besighede moet wette gehoorsaam

Kommentaar

Republikein 2022-08-10

Meld asseblief aan om kommentaar te lewer

MELD AAN